مسجد الاقصی پر صیہونی حملے پر حماس کا ردعمل

?️ 22 اپریل 2022

سچ خبریں:فلسطین کی مزاحمتی تحریک حماس نے مسجد الاقصی پر صیہونیوں کے حملے پر شدید ردعمل کا اظہار کرتے ہوئے کہا کہ اس طرح کے حملے فلسطینیوں کی اسلامی شناخت نہیں بدل سکتے۔
فلسطین کی اسلامی مزاحمتی تحریک حماس کے سیاسی بیورو کے سربراہ نے قابضین کو خبردار کیا ہے کہ اگر آپ کو یہ وہم ہے کہ مسجد الاقصیٰ پر حملہ کرکے اس کی اسلامی شناخت کو تبدیل کر سکتے ہیں تو آپ بالکل غلط ہیں،یہ بات اسماعیل ہنیہ نے جمعرات کے روز مسجد الاقصی میں موجودہ مسائل پر ردعمل کا اظہار کرتے ہوئے کہی۔

انہوں نے کہا کہ صہیونیوں کی جارحیت سے کشیدگی میں مزید شدت آئے گی اور ان سے نمٹنے کے اقدامات میں اضافہ ہوگا،ہنیہ نے کہا کہ مسجد الاقصی میں صیہونی جارحیت اس حکومت کی عمر کو کم کرنے کے ساتھ ساتھ اس جابر حکومت کے خاتمے کا باعث ہوگا،اسماعیل ہنیہ نے کہا کہ فلسطینی عوام اور مسجد اقصیٰ میں اعتکاف کرنے والے اس مقدس مقام کے دفاع میں سب سے آگے ہیں اور ثابت قدم رہیں گے۔

ہنیہ نے بتایا کہ صہیونی دشمن کے ساتھ تعلقات معمول پر لانے والے ممالک کو مسجد الاقصیٰ پر جارحیت کے پیش نظر مقبوضہ فلسطین سے اپنے سفیروں کو فوری طور پر واپس بلانا چاہیے۔