غزہ میں روزانہ 300 رہائشی مکانات گرائے جاتے ہیں

غزہ میں روزانہ 300 رہائشی مکانات گرائے جاتے ہیں

فلسطینی انفارمیشن سینٹر کے مطابق، اس ادارے نے اپنی رپورٹ میں کہا کہ قابض صہیونی فوج غزہ سٹی اور جبالیا کیمپ میں روزانہ تقریباً 300 رہائشی مکانات کو جزوی یا مکمل طور پر تباہ کر رہی ہے۔ یہ کارروائیاں تقریباً 100 ٹن بارودی مواد سے لیس 15 بم بردار بکتر بند گاڑیوں کے ذریعے انجام دی جا رہی ہیں۔

بیان میں کہا گیا کہ یہ دھماکے تیز ترین انداز میں اس مقصد سے کیے جا رہے ہیں کہ غزہ شہر کو ملبے کا ڈھیر بنا دیا جائے اور اس کے باسیوں کو جبری ہجرت پر مجبور کیا جائے۔ یہ سلسلہ گزشتہ 23 ماہ سے جاری اجتماعی نسل کشی کی پالیسی کا حصہ ہے۔

ہیومن رائٹس واچ نے مزید بتایا کہ اس کے میدانی عملے نے ایسے شواہد اکٹھے کیے ہیں جن سے ظاہر ہوتا ہے کہ قابض فوج پوری کی پوری آبادی والے محلوں کو صفحہ ہستی سے مٹانے کے لیے ان بم بردار گاڑیوں کے استعمال میں تیزی سے اضافہ کر رہی ہے۔

 جبالیا البلد اور جبالیا النزله کی بیشتر آبادی پہلے ہی تباہ ہو چکی ہے اور اب یہ تباہی جنوبی، مشرقی اور شمالی محاذوں سے ہوتے ہوئے غزہ کے مرکز کی طرف بڑھ رہی ہے۔

ادارے نے نشاندہی کی کہ پہلے روزانہ تقریباً 7 گاڑیاں استعمال کی جا رہی تھیں، لیکن اب یہ تعداد بڑھ کر 15 تک جا پہنچی ہے، جبکہ بعض گاڑیوں میں 7 ٹن تک بارودی مواد بھرا ہوتا ہے۔ ان کا ہدف جبالیا، الزیتون، الصبرہ، الشجاعیہ، التفاح، الصفطاوی اور ابو اسکندر جیسے علاقے ہیں۔

بیان میں مزید کہا گیا کہ گھروں اور محلوں کو اس تیز رفتار تباہی کے ذریعے صاف کرنا اس بات کی علامت ہے کہ اسرائیل غزہ شہر کو مکمل طور پر مٹانے کے عزم پر کاربند ہے۔