غزہ اور مغربی پٹی شہدا کے تازہ ترین اعداد و شمار

19 مئی 2021

سچ خبریں:غزہ کی وزارت صحت نے فلسطینی شہدا کے بارے میں نئے اعدادوشمار کا اعلان کیا جن میں درجنوں خواتین اور بچے شامل ہیں۔
فلسطین ٹوڈے کی رپورٹ کے مطابق آج (بدھ ، 19 مئی) صہیونی حکومت کے غزہ کی پٹی پر حملے کا دسواں دن ہے اور فلسطین کی وزارت صحت کے مطابق ان حملوں میں شہیدوں کی تعداد 219 ہوگئی ہے جن میں 63 بچے ، 36 خواتین اور 16 عمر رسیدہ افراد شامل ہیں رپورٹ کے مطابق آج صبح غزہ کی پٹی کے وسط میں الشہدا اسٹریٹ پر گھروں پر ہونے والے صیہونی حملوں میں تین افرادشہید ہوگئے،صیہونیوں نے بھی اقصی چینل کے نمائندے یوسف ابو حسین کو ان کے گھر پر بمباری کرکے شہید کردیا۔

واضح رہے کہ غزہ کی پٹی میں زخمیوں کی تعداد 1 ہزار 530 تک پہنچ گئی ہے جن میں سے 50 کی حالت تشویشناک ہےجبکہ زخمیوں میں 450 بچے اور 295 خواتین شامل ہیں، ادھر آج صہیونی حکومت نے رفح کے مشرق میں واقع الجنینه کے علاقے میں حماس کے سینئر رہنما عطاء اللہ ابو الصباح کے گھر کو بھی نشانہ بنایا، اناطولی نیوز ایجنسی کی رپورٹ کے مطابق ، مغربی کنارے میں 23 فلسطینی شہید جبکہ 3825 زخمی ہوئے ہیں۔

قابل ذکر ہے کہ فلسطینی مزاحمتی تحریک نے اسرائیلی حملوں کے جواب میں مقبوضہ علاقوں میں 3000 سے زیادہ راکٹ فائر کیے ہیں جس کے بعد صیہونیوں پر خوف وہراس طاری ہے یہاں تک کہ بہت سارے تجزیہ کاروں کا کہنا ہے کہ صیہونی شہری اپنا سامان پیک کر کے اسرائیل سے بھاگنے کے لیے تیار بیٹھے ہوئے ہیں اور مقبوضہ علاقوں کے ائر پورٹ کھلنے کا انتظار کررہے ہیں جبکہ خود صیہونی تجزیہ کاروں کا کہنا ہے کہ فلسطینی مزاحمتی تحریک کے مقابلہ میں صیہونیوں کو تاریخی شکست کا سامنا ہے۔