عراقی سیاسی کونسل کا مطالبہ،پارلیمنٹ کا پہلا اجلاس جلد از جلد بلایا جائے

?️ 15 دسمبر 2025

عراقی سیاسی کونسل کا مطالبہ، پارلیمنٹ کا پہلا اجلاس جلد از جلد بلایا جائے

عراقی سیاسی کونسل، جو ملک کے سنی سیاسی گروہوں پر مشتمل ہے، نے صدرِ عراق سے مطالبہ کیا ہے کہ وہ پارلیمنٹ کے پہلے اجلاس کی تاریخ فوری طور پر مقرر کریں تاکہ اسپیکر اور ان کے دو نائبین کا انتخاب کیا جا سکے۔

عراقی سرکاری خبر رساں ایجنسی کے مطابق، قومی سیاسی کونسلِ عراق نے وفاقی سپریم کورٹ کی جانب سے پارلیمانی انتخابات کے نتائج کی توثیق پر اطمینان کا اظہار کرتے ہوئے اسے خوش آئند قرار دیا ہے۔

کونسل نے الیکشن کمیشن اور عدالتی اداروں کی جانب سے چھٹی پارلیمانی مدت کے انتخابات کے کامیاب اور شفاف انعقاد پر ان کی کوششوں کو سراہا۔ یہ بیانات بغداد میں اتحادِ عزم کے سربراہ مثنیٰ السامرائی کے دفتر میں منعقدہ اجلاس کے دوران سامنے آئے۔

اجلاس میں شریک رہنماؤں نے آئندہ حکومت کی تشکیل، اس کے پروگرام اور نئے حکومت کو درپیش چیلنجز پر تبادلہ خیال کیا۔ انہوں نے سیاسی شراکت داروں کے ساتھ مشاورت اور رابطے کو تیز کرنے پر زور دیا تاکہ ایسی حکومت تشکیل دی جا سکے جو عراقی عوام کی توقعات پر پورا اتر سکے۔

کونسل نے اس بات پر بھی زور دیا کہ آئندہ حکومتی پروگرام میں بنیادی ترجیحات کو شامل کیا جانا ضروری ہے۔ شرکاء نے صدرِ عراق سے مطالبہ کیا کہ پارلیمنٹ کا پہلا اجلاس، جس میں اسپیکر اور ان کے دو نائبین کا انتخاب ہونا ہے، جلد از جلد بلایا جائے اور تجویز دی کہ یہ اجلاس 25 دسمبر سے پہلے منعقد کیا جائے۔

واضح رہے کہ وفاقی سپریم کورٹِ عراق نے اپنے بیان میں کہا ہے کہ مکمل جانچ پڑتال کے بعد یہ ثابت ہوا کہ پارلیمانی انتخابات آئینی اور قانونی تقاضوں کے مطابق منعقد ہوئے، اور نتائج کو کالعدم قرار دینے کا کوئی جواز موجود نہیں، اس لیے 2025 کے پارلیمانی انتخابات کے حتمی نتائج کی توثیق کی جاتی ہے۔

عراقی آئین کے مطابق، نتائج کی توثیق کے دو ہفتوں کے اندر نئی پارلیمنٹ کا پہلا اجلاس سب سے عمر رسیدہ رکن کی صدارت میں منعقد ہونا چاہیے، جس کے بعد اسپیکر کا انتخاب کیا جاتا ہے۔ اس کے بعد پارلیمنٹ کو 30 دن کے اندر دو تہائی اکثریت سے صدرِ مملکت کا انتخاب کرنا ہوتا ہے، اور صدر کو زیادہ سے زیادہ دو ہفتوں کے اندر سب سے بڑی شیعہ پارلیمانی جماعت کے نامزد امیدوار کو حکومت تشکیل دینے کی ذمہ داری سونپنی ہوتی ہے۔