عراق کو ایران کے خلاف جابرانہ محاصرے کا حصہ نہیں بننا چاہیے : دبیر کل کتائب عراق

سچ خبریں: ابو آلاء الولائی، دبیر کل کتائب سید الشہداء عراق نے تاکید کی ہے کہ عراق کے لیے یہ مناسب نہیں کہ وہ ایران کے خلاف ظالمانہ محاصرے کا حصہ ہو، وہ ایران جو علم اور جہاد کی سرزمین ہے۔

انہوں نے مزید کہا کہ وہ عراق جو لبیک یا حسین (ع) کے نعرے کو اپنا لائحہ عمل قرار دیتا ہے، اسے چاہیے کہ بہادرانہ موقف اپنا کر، جو تسلط پسندی کو مسترد کرتا ہے، اپنی آواز سب تک پہنچائے۔

الولائی نے عراقی پارلیمنٹ کے ارکان سے بھی مطالبہ کیا کہ وہ حکومت کو امریکہ کے احکامات کے سامنے تسلیم نہ ہونے پر پابند کرنے کے لیے فیصلہ کن موقف اپنائیں، اسلامی جمہوریہ ایران کے خلاف عائد محاصرے کو مسترد کریں اور روس اور چین کی طرح ان احکامات کے سامنے کھڑے ہوں۔

اس سے قبل عادل عبدالمہدی نے اپنے ذاتی صفحے پر لکھا تھا کہ عراقی ہوائی اڈوں کو ایرانی پروازوں کے لیے بند کرنا بہت بڑی غلطی اور قومی حاکمیت سے پسپائی ہے۔

انہوں نے مزید کہا کہ عراقی ہوائی اڈوں کو ہمارے پڑوسی، اتحادی اور دوست کے لیے بند کرنا ایک بہت بڑی غلطی، قومی حاکمیت سے پسپائی اور ہمارے قومی مفادات اور مستقبل کو قربان کرنے کے مترادف ہے۔

عراق کے سابق وزیر اعظم نے یہ بھی کہا کہ فیصلے پر نظرثانی غلطی پر اصرار سے بہتر ہے۔