صیہونی فوج کا فلسطینی مظاہرین پر حملہ / 270 افراد زخمی

?️ 31 جولائی 2021

سچ خبریں:فلسطینی ہلال احمر نے اعلان کیا کہ مقبوضہ مغربی کنارے میں فلسطینی مظاہرین پر اسرائیلی فورسز کے حملے میں تقریبا 270 فلسطینی زخمی ہوئے۔
الجزیرہ چینل کی رپورٹ کے مطابق فلسطینی ہلال احمر نے اطلاع دی ہے کہ مقبوضہ مغربی کنارے میں فلسطینی مظاہرین کے ایک گروپ پر صہیونی فوج کےحملے میں تقریبا 270 فلسطینی زخمی ہوئے ہیں، فلسطینی ہلال احمر کے مطابق زخمیوں کی اکثریت مقبوضہ مغربی کنارے کے شمال میں واقع نابلس شہر کے نواحی گاؤں بیتا کے رہائشی ہیں جو صہیونی آباد کاروں کے کاروانوں کے خلاف مئی سے باقاعدہ احتجاج کر رہے ہیں۔

فلسطینی ہلال احمر نے یہ بھی کہا کہ جمعہ کی جھڑپوں میں زخمی ہونے والے بیشتر افراد کو آنسو گیس ، گولیوں یا ربڑ کی گولیوں سے نشانہ بنایا گیا جن کا علاج جاری ہے،یادرہے کہ گزشتہ ہفتے صیہونی عسکریت پسندوں کی فائرنگ سے دو فلسطینی شدید زخمی ہوئے تھے۔

قابل ذکر ہے کہ بیتا گاؤں جو کہ حالیہ مہینوں میں صہیونی آباد کاری کے خلاف فلسطینی عوام کے احتجاج کا بنیادی مرکز رہا ہے ،اس میں اس ماہ کے شروع میں فلسطینیوں کے سینکڑوں مظاہرے ہوئے ہیں جنہیں صہیونی عسکریت پسندوں کے وحشیانہ حملوں کا شکار بنایا گیا ہےجس میں کم از کم 320 فلسطینی زخمی ہوئے ہیں۔

واضح رہے کہ حالیہ بارہ روزہ سیف القدس جنگ میں فلسطینی مزاحمتی تحریک کے ہاتھوں صیہونیوں کو ملنے والے بری شکست کے بعد صیہونی حکام بوکھلاہٹ کا شکار ہوگئے ہیں لہذا وہ جنگ میں شکست کے بعد عالمی سطح پر ہونے والی اپنی خفت کو مٹانے یا کم کرنے کے لیے آئے دن اشتعال انگیز کاروائیاں کر رہے ہیں جبکہ مزاحمتی تحریک انھیں انتباہ دے چکی ہے کہ دوبارہ کوئی غلطی کرنے سے پہلے ہزار بار سوچ لینا کیوں کہ ہمارا ہاتھ ابھی بھی ٹریگر پر ہے۔