صہیونی صحافی کا ممکنہ نئی جنگ پر اظہارِ تشویش،بھاری نقصانات کا انتباہ

صہیونی صحافی کا ممکنہ نئی جنگ پر اظہارِ تشویش،بھاری نقصانات کا انتباہ

اسرائیلی قیادت کی جانب سے ایران کے خلاف فوجی دھمکیوں کے باوجود مقبوضہ علاقوں میں ایک بار پھر جنگ کے خدشات پر خوف و ہراس پایا جا رہا ہے۔ ایک اسرائیلی صحافی نے ممکنہ نئی جنگ کے نتائج پر سنجیدہ سوالات اٹھاتے ہوئے خبردار کیا ہے کہ اس کے اثرات نہایت سنگین ہو سکتے ہیں۔

اسرائیلی اخبار معاریو کی صحافی اوریت میلر نے اپنی رپورٹ میں لکھا کہ گزشتہ چند ہفتوں سے ایران کے ساتھ دوبارہ جنگ کی باتیں گردش کر رہی ہیں اور اسرائیل و امریکہ اس حوالے سے امریکی صدر دونالد ترامپ کے فیصلے کے منتظر ہیں۔ تاہم انہوں نے زور دیا کہ جنگی نعروں کے پس منظر میں یہ سوچنا ضروری ہے کہ اسرائیل کو اس مہم جوئی سے کیا حاصل ہوگا اور کیا نقصان اٹھانا پڑے گا۔

میلر نے اعتراف کیا کہ ایران پر ممکنہ حملے سے مطلوبہ نتائج،جیسے کہ حکومت کی تبدیلی، حاصل ہونا مشکوک ہے۔ اس کے برعکس ایران کی جانب سے جوابی کارروائیاں اسرائیل کے لیے بھاری جانی و مالی نقصان کا سبب بن سکتی ہیں۔ انہوں نے یاد دلایا کہ گزشتہ 12 روزہ جنگ کے بعد بھی ہزاروں اسرائیلی اپنے گھروں کو واپس نہیں لوٹ سکے اور کئی متاثرہ علاقوں کی بحالی کا عمل مکمل نہیں ہو سکا۔

رپورٹ میں کہا گیا کہ نئی جنگ کی صورت میں سرکاری و عوامی عمارتوں کو نقصان پہنچنے، جانی ہلاکتوں، فضائی پروازوں کی معطلی، بیرونِ ملک پھنسے اسرائیلی شہریوں اور عالمی ایئرلائنز کی پروازوں کی منسوخی جیسے مسائل دوبارہ جنم لے سکتے ہیں۔ اس کے علاوہ معیشت اور تعلیمی نظام کی بندش، ریزرو فوجیوں کی بڑے پیمانے پر طلبی اور مالی اخراجات میں اضافہ بھی متوقع ہے۔

صحافی نے خبردار کیا کہ جب تک اسرائیلی معیشت مکمل طور پر سنبھل نہیں جاتی اور سرمایہ کاری بحال نہیں ہوتی،نئی جنگ ملک کو ایک خطرناک چکر میں دھکیل سکتی ہے۔ انہوں نے اس امکان کا بھی ذکر کیا کہ کسی ممکنہ تنازع میں حزب اللہ، یمن اور مغربی کنارے میں فلسطینی مزاحمتی قوتیں بھی مختلف محاذوں پر شامل ہو سکتی ہیں، جس سے صورتحال مزید پیچیدہ ہو سکتی ہے۔