صہیونی دشمن کا بھی یمن میں امریکہ جیسا انجام ہوگا : حزب اللہ

سچ خبریں: حزب اللہ لبنان نے صہیونی ریجیم کے یمن پر حملوں پر سخت ردعمل ظاہر کرتے ہوئے ایک بیان جاری کیا ہے۔

حزب اللہ لبنان کے بیان میں کہا گیا ہے کہ ہم آج صبح یمن کے بنادر اور انفراسٹرکچر پر صہیونی دشمن کے وحشیانہ حملے کی شدید مذمت کرتے ہیں۔ دشمن یہ سمجھتا ہے کہ ان حملوں سے یمنی عوام کے اقدامات روکے جا سکتے ہیں یا انہیں غزہ کی حمایت سے پیچھے ہٹایا جا سکتا ہے، یا یمن کے بہادر مجاہدین کے صہیونی ریجیم کے دل پر لگنے والے کاری ضربات کو روکا جا سکتا ہے۔

حزب اللہ نے مزید کہا کہ صہیونی دشمن آج بھی یمن کی صابر اور جہدکار قوم کی حقیقت کو سمجھنے سے قاصر ہے۔ یمنی عوام اور ان کے رہنماوں کا موقف حق کی حمایت اور باطل کے سامنے جھکنے سے انکار کی علامت ہے، جو امام حسینؑ کے مشن کی عکاسی کرتا ہے۔ یمن پر حملے ان کے عزم کو مزید مضبوط کریں گے، یہاں تک کہ غزہ پر حملے بند ہوں اور محاصرہ اٹھایا جائے۔

بیان میں واضح کیا گیا کہ بزدلانہ حملوں سے صہیونی دشمن کو کوئی فائدہ نہیں ہوگا، جیسا کہ امریکہ کی یمن میں مداخلت ناکام ہوئی، اسی طرح یہ حملے بھی ناکامی سے دوچار ہوں گے۔

حزب اللہ نے اپنے بیان کے اختتام پر کہا کہ ہم ایک بار پھر یمنی عوام کی مکمل حمایت کا اعلان کرتے ہیں اور تمام آزاد ممالک بالخصوص عرب و اسلامی دنیا سے اپیل کرتے ہیں کہ وہ اس بہادر قوم کی حمایت کریں، جو امتِ اسلامی کی عزت و وقار کی پاسبان ہے۔