شام اسرائیل کے ساتھ تعلقات کو معمول پر لانے کے وسیع معاہدوں کا مخالف

?️ 12 نومبر 2025

شام اسرائیل کے ساتھ تعلقات کو معمول پر لانے کے وسیع معاہدوں کا مخالف

شام کی عبوری حکومت کے سربراہ احمد الشرع المعروف ابو محمد الجولانی نے کہا ہے کہ ان کا ملک اسرائیل کے ساتھ تعلقات معمول پر لانے کے علاقائی معاہدوں کی حمایت نہیں کرتا۔ انہوں نے واضح کیا کہ کسی بھی مستقبل کے معاہدے میں شام کی قبضے میں لی گئی سرزمینوں کی واپسی بنیادی شرط ہوگی۔

شامی نشریاتی ادارے الاخباریہ کے مطابق احمد الشرع نے امریکی اخبار واشنگٹن پوسٹ سے گفتگو میں کہا کہ شام ان معاہدوں کا حصہ نہیں بنے گا جنہیں سابق امریکی صدر ڈونلڈ ٹرمپ نے دیگر عرب ممالک پر دستخط کے لیے دباؤ ڈال کر آگے بڑھایا تھا۔

ان کا کہنا تھا کہ شام ایسا معاہدہ چاہتا ہے جو اسرائیلی قبضے سے اپنی زمینوں کی واپسی کو یقینی بنائے۔ الشرع نے بتایا کہ اسرائیل کے ساتھ مذاکرات مشکل ضرور ہیں لیکن یہ سلسلہ امریکہ اور دیگر بین الاقوامی فریقوں کی ثالثی میں جاری ہے۔

انہوں نے مزید کہا کہ کسی بھی ممکنہ سمجھوتے کے لیے ضروری ہے کہ اسرائیل بشار الاسد حکومت کے زوال سے پہلے کی سرحدوں پر واپس جائے۔ ساتھ ہی انہوں نے یہ بھی کہا کہ شام کی تعمیر نو کے لیے امریکی اور مغربی پابندیوں کا خاتمہ ضروری ہے۔ ان کے مطابق امریکی کانگریس کے بیشتر ارکان اس بات سے متفق ہیں کہ شام پر عائد پابندیاں ختم کی جائیں۔

الشرع نے مزید کہا کہ موجودہ امریکی حکومت شام کے استحکام اور وحدت کی حامی ہے اور سمجھتی ہے کہ شام کو اقتصادی بحالی اور علاقائی خودمختاری کے تحفظ کا موقع ملنا چاہیے۔

انہوں نے امریکی چینل فاکس نیوز سے گفتگو میں اسرائیل کے ساتھ براہ راست مذاکرات کی تردید کی تاہم کہا کہ واشنگٹن غیر مستقیم رابطوں کو آسان بنانے کا کردار ادا کر سکتا ہے۔

الشرع کے مطابق شام کی صورتحال ان عرب ممالک سے مختلف ہے جنہوں نے ابراہیم معاہدوں کے تحت اسرائیل سے تعلقات بحال کیے۔ انہوں نے واضح کیا کہ شام فی الحال اسرائیل کے ساتھ تعلقات معمول پر لانے کی کسی کوشش کا حصہ نہیں بنے گا۔