سعودی عرب پہلے والا سعودی عرب نہیں رہا؛امریکہ میں سعودی سفیر

?️ 27 اکتوبر 2022

سچ خبریں:امریکہ میں سعودی عرب کے سفیر نے اپنے ملک اور امریکہ کے درمیان کشیدگی کا حوالہ دیتے ہوئے کہا کہ یہ سعودی عرب گزشتہ پانچ یا دس سال کا سعودی عرب نہیں ہے۔

رشیا ٹوڈے کی رپورٹ کے مطابق امریکہ میں سعودی سفیر ریما بنت بندر نے ایک انٹرویو میں اس بات پر زور دیا کہ سعودی عرب اور امریکہ کے درمیان کشیدگی سیاسی نہیں بلکہ خالصتاً اقتصادی ہے اور دونوں ممالک کے درمیان تعلقات کا جائزہ "مثبت” ہے۔

ریاض کے سفیر نے سی این این چینل کو انٹرویو دیتے ہوئے کہا کہ میں نے سنا ہے کہ بہت سے لوگ امریکہ اور سعودی عرب کے تعلقات میں اصلاحات یا نظر ثانی کی بات کر رہے ہیں؛ میرے خیال میں یہ ایک مثبت چیز ہے کیونکہ آج کا سعودی عرب پانچ دس سال پہلے والا سعودی عرب نہیں ہے۔

واشنگٹن کے ساتھ اپنے ملک کے تناؤ کے بارے میں بنت بندر نے مزید کہا کہ یہ واضح ہے کہ ہم اختلاف کے نقطہ پر پہنچ چکے ہیں اور بہت سے لوگوں نے اسے سیاسی شکل دینے کی کوشش کی ہے جبکہ یہ کوئی سیاسی مسئلہ نہیں ہے، بلکہ محض رجحانات کو اپنانے کے 40 یا 50 سال کے تجربے پر مبنی اقتصادی فیصلہ ہے۔

انہوں نے تاکید کرتے ہوئے کہا کہ ہم کسی کی سیاست میں دخالت نہیں کرتے بلکہ اس مسئلے میں صرف ایک متوازن فریق کے طور پر شامل ہیں نیز توانائی کی منڈی کے ذریعے معیشت کو مستحکم کرنے میں معاون عنصر کا کردار ادا کر رہے، یہی کردار ہم نے پوری تاریخ میں ادا کیا ہے۔