تنقید کے بعد برطانیہ کی فلسطین کے متعلق سیاسی موقف مین ہچکچاہٹ

برطانیہ کی جانب سے فلسطین کو بطور ملک تسلیم کرنے کے منصوبے نے مختلف ردعمل جنم دیے ہیں، تاہم لندن نے ان الزامات کو مسترد کیا ہے کہ اس اقدام سے حماس کو فائدہ پہنچے گا۔

رائٹرز کے مطابق، برطانوی وزیر اعظم کیئر اسٹارمر نے اسرائیل کو ستمبر تک وقت دیتے ہوئے کہا ہے کہ اگر اسرائیل نے فلسطینیوں کی مشکلات کا حل نہ نکالا تو برطانیہ فلسطین کو تسلیم کر لے گا۔ اس اعلان پر اسرائیلی وزیر اعظم نتانیہو نے سخت ردعمل دیتے ہوئے اسے حماس کو انعام دینے کے مترادف قرار دیا۔امریکی صدر ڈونلڈ ٹرمپ نے بھی کہا کہ انہیں نہیں لگتا کہ حماس کو فلسطین کے تسلیم ہونے پر کوئی انعام ملنا چاہیے۔

لیکن برطانوی وزیر برائے نقل و حمل ہیدی الیگزینڈر نے میڈیا سے گفتگو میں ان تنقیدوں کو مسترد کیا اور کہا کہ فلسطین کو تسلیم کرنا حماس کو انعام دینے کے مترادف نہیں بلکہ یہ فلسطینی عوام، خاص طور پر غزہ میں بھوک اور بیماری کے شکار بچوں کے لیے ہے۔

انہوں نے کہا کہ برطانیہ اسرائیل پر دباو بڑھائے گا تاکہ وہ غزہ پر پابندیاں نرم کرے اور انسانی امداد دوبارہ داخل ہو سکے۔

ادھر فرانس کے صدر امانوئل میکرون نے بھی اعلان کیا ہے کہ وہ ستمبر میں اقوام متحدہ کی جنرل اسمبلی میں فلسطین کو تسلیم کرنے کا اعلان کریں گے، جو دو ریاستی حل کی حمایت کے طور پر دیکھا جا رہا ہے۔

اس اقدام کو یورپی یونین کے بعض ممالک، امریکہ اور اسرائیل کی جانب سے سخت مخالفت کا سامنا ہے۔ امریکی وزیر خارجہ مارکو روبیو نے اسے غیر ذمہ دارانہ فیصلہ قرار دیا، اور ڈونلڈ ٹرمپ نے میکرون کے بیان کو بے معنی کہا۔

چند روز بعد، برطانوی وزیر اعظم نے بھی کہا کہ اگر اسرائیل غزہ کی موجودہ صورتحال میں بہتری نہ لایا اور امن کے عمل کے لیے سنجیدہ اقدامات نہ کیے، تو برطانیہ فلسطین کو تسلیم کر لے گا۔

یہ صورتحال مشرق وسطیٰ کے حساس سیاسی ماحول میں ایک اہم موڑ ثابت ہو سکتی ہے، خاص طور پر غزہ میں جاری انسانی بحران اور اسرائیلی محاصرے کے تناظر میں