ترکی میں اسرائیل مخالف نمائش، غزہ جنگ کی منظرکشی 

ترکی میں اسرائیل مخالف نمائش، غزہ جنگ کی منظرکشی

ترکی کے شہر انطالیہ میں ایک متنازع اور سخت اسرائیل مخالف نمائش منعقد کی گئی جس میں غزہ کی جنگ کو علامتی اور اشتعال انگیز انداز میں پیش کیا گیا۔ اسرائیلی اخبار یدیعوت آحارانوت کے مطابق اس نمائش میں اسرائیلی اور امریکی سیاسی شخصیات کو فلسطینی بچوں کے خلاف مبینہ جرائم کی علامتی منظرکشی میں دکھایا گیا۔

نمائش میں بنیامین نتن یاہو، ڈونلڈ ٹرمپ، بل کلنٹن اور جیفری اپسٹین کی مورتیاں رکھی گئی تھیں جنہیں فلسطینی بچوں سے مشابہ گڑیاؤں کے اوپر کھڑے دکھایا گیا تھا۔ منظر میں انہیں بچوں کے جسمانی اعضا کھاتے اور خون پیتے ہوئے علامتی انداز میں پیش کیا گیا جبکہ میز پر اسرائیلی پرچم اور ڈالر نوٹ بھی دکھائے گئے تھے۔

یہ پروگرام انجمن نوجوانان آناتولی کے نام سے ایک گروہ نے منعقد کیا۔ منتظمین کے مطابق اس کا مقصد اپسٹین اسکینڈل اور فلسطینیوں کے خلاف اسرائیلی پالیسیوں پر احتجاج کرنا تھا، جن کے بارے میں ان کا دعویٰ ہے کہ انہیں امریکہ کی وسیع حمایت حاصل ہے۔

جیفری اپسٹین کا معاملہ کئی برسوں سے امریکی سیاست میں تنازع کا باعث رہا ہے۔ وہ 2008 میں جنسی جرائم میں سزا یافتہ قرار پائے تھے اور بعد میں 2019 میں کم عمر لڑکیوں کی اسمگلنگ کے الزام میں دوبارہ گرفتار ہوئے، تاہم اسی سال نیویارک کی جیل میں ان کی موت واقع ہوگئی جسے سرکاری طور پر خودکشی قرار دیا گیا۔ بعد ازاں ان سے متعلق دستاویزات کی اشاعت نے امریکی سیاسی حلقوں میں نئی بحث چھیڑ دی۔

رپورٹس کے مطابق حالیہ برسوں میں جاری ہونے والی دستاویزات میں مختلف بااثر شخصیات کے ساتھ اپسٹین کے روابط اور مالی لین دین کا ذکر شامل ہے، اگرچہ ان میں نام آنے والے کئی افراد نے کسی بھی غیر قانونی سرگرمی سے لاعلمی یا لاتعلقی کا اظہار کیا ہے۔

انطالیہ میں ہونے والی اس نمائش نے سوشل میڈیا اور سیاسی حلقوں میں شدید ردعمل کو جنم دیا ہے، جہاں بعض حلقے اسے آزادی اظہار قرار دے رہے ہیں جبکہ دیگر اسے نفرت انگیز اور اشتعال دلانے والا اقدام قرار دے رہے ہیں۔