بھارتی وزیر خارجہ کا امریکا کو دوٹوک جواب اگر پسند نہیں تو ہم سے تیل نہ خریدیں

بھارتی وزیر خارجہ کا امریکا کو دوٹوک جواب اگر پسند نہیں تو ہم سے تیل نہ خریدیں

بھارت کے وزیر خارجہ سوبرامانیام جے شنکر نے امریکا اور مغربی ممالک کے دباؤ کو مسترد کرتے ہوئے کہا ہے کہ نئی دہلی اپنی توانائی کی ضروریات اور قومی مفادات کے مطابق فیصلے کرے گا۔ ان کا کہنا تھا کہ روسی خام تیل کی درآمد نہ صرف بھارت کی توانائی کے تحفظ کے لیے ضروری ہے بلکہ عالمی منڈی میں استحکام کا سبب بھی بنتی ہے۔

بھارتی میڈیا ٹائمز آف انڈیا کے مطابق جے شنکر نے ہفتے کے روز ایکنامک ٹائمز گلوبل لیڈرشپ فورم میں خطاب کرتے ہوئے واضح پیغام دیا کہ بھارت کسی دباؤ میں نہیں آئے گا۔ انہوں نے کہا اگر آپ کو پسند نہیں تو نہ خریدیں، لیکن یورپ تو روس سے خرید رہا ہے۔ اگر آپ کو اعتراض ہے تو ہم سے بھی نہ خریدیں۔

وزیر خارجہ نے مزید کہا کہ سن 2022 میں عالمی سطح پر تیل کی قیمتوں میں شدید اضافہ ہوا تھا، اس وقت بھی یہ بات کہی گئی کہ اگر بھارت روس سے تیل خریدے تو بہتر ہے تاکہ قیمتیں قابو میں رہیں۔ ان کے مطابق بھارت کی یہ پالیسی ایک طرف اپنے عوام کے مفاد میں ہے تو دوسری طرف دنیا کے لیے بھی فائدہ مند ہے۔

امریکا اور بھارت کے درمیان تجارتی مذاکرات پر بات کرتے ہوئے جے شنکر نے کہا کہ نئی دہلی کے اپنے سرخ لکیر والے اصول ہیں اور وہ کسی بھی دباؤ میں ان سے پیچھے نہیں ہٹے گا۔ انہوں نے زور دیا کہ بھارت اپنے کسانوں اور چھوٹے کاروباروں کے مفادات پر کوئی سمجھوتہ نہیں کرے گا۔

امریکی صدر ڈونلڈ ٹرمپ کی جانب سے بھارتی مصنوعات پر 25 فیصد اضافی ٹیکس نافذ کرنے اور روسی تیل کے ساتھ تجارت پر مزید محصولات عائد کرنے کے فیصلے پر بھی جے شنکر نے تنقید کی اور کہا کہ یہ پالیسیاں غیر متعارف ہیں۔

روس کے ساتھ تعلقات پر بات کرتے ہوئے بھارتی وزیر خارجہ نے کہا کہ نئی دہلی ماسکو کے ساتھ تجارتی تعلقات بڑھانے کا خواہاں ہے۔ تاہم انہوں نے یوکرین جنگ کے حوالے سے بھارت کے مؤقف کو دہراتے ہوئے کہا کہ نئی دہلی فوری طور پر جنگ کے خاتمے کا حامی ہے۔

جے شنکر کے مطابق بھارت کے امریکا اور چین سمیت بڑی طاقتوں کے ساتھ تعلقات میں بعض اوقات اختلافات پیدا ہوتے ہیں، لیکن مجموعی طور پر یہ تعلقات مثبت سمت میں آگے بڑھ رہے ہیں۔