برطانیہ کی اکثریت ایران کے خلاف امریکی فوجی کارروائی کے لیے اڈوں کے استعمال کی مخالف

برطانیہ کی اکثریت ایران کے خلاف امریکی فوجی کارروائی کے لیے اڈوں کے استعمال کی مخالف

برطانیہ میں کیے گئے ایک تازہ عوامی جائزے سے ظاہر ہوا ہے کہ ملک کی اکثریت اس بات کی حامی نہیں کہ امریکہ ایران کے خلاف کسی ممکنہ فوجی کارروائی کے لیے برطانوی فوجی اڈوں کو استعمال کرے۔

برطانوی ادارہ برائے عوامی رائے شماری یوگوو کے سروے میں پانچ ہزار سے زائد بالغ افراد نے حصہ لیا۔ نتائج کے مطابق ۵۸ فیصد افراد نے اس امکان کی مخالفت کی کہ امریکہ کو ایران کے خلاف کارروائی کے لیے برطانیہ کے فضائی اڈے استعمال کرنے کی اجازت دی جائے۔ ان میں سے ۳۸ فیصد نے شدید مخالفت جبکہ ۲۰ فیصد نے جزوی مخالفت کا اظہار کیا۔

سیاسی جماعتوں کے حامیوں میں بھی اس تجویز کے خلاف نمایاں ردعمل سامنے آیا۔ حکمران جماعت لیبر پارٹی کے ۴۸ فیصد، لبرل ڈیموکریٹس کے ۴۷ فیصد اور گرین پارٹی کے ۶۸ فیصد حامیوں نے اس منصوبے کی سخت مخالفت کی۔

یہ سروے ایسے وقت سامنے آیا ہے جب لندن اور واشنگٹن کے تعلقات بعض معاملات پر تناؤ کا شکار ہیں، جن میں چاگوس جزائر اور دیگو گارسیا کے فوجی اڈے سے متعلق امور بھی شامل ہیں۔ اطلاعات کے مطابق برطانوی حکومت نے تاحال امریکہ کو اپنے فضائی اڈوں کے استعمال کی اجازت نہیں دی۔

برطانوی اخبار دی ٹائمز نے رپورٹ کیا ہے کہ وزیر اعظم کیئر اسٹارمر کی حکومت ایران کے خلاف کسی ممکنہ فوجی مہم جوئی میں شامل ہونے سے گریزاں ہے اور اس حوالے سے قانونی پہلوؤں کا جائزہ لیا جا رہا ہے۔ رپورٹ کے مطابق اگر برطانیہ کسی ایسے اقدام کا حصہ بنتا ہے جسے بین الاقوامی قانون کے تحت غیرقانونی قرار دیا جائے تو اسے قانونی نتائج کا سامنا کرنا پڑ سکتا ہے۔

اسی تناظر میں اخبار ڈیلی ٹیلی گراف نے لکھا ہے کہ اقوام متحدہ کی ایک قرارداد کے تحت اگر کوئی ملک کسی ممکنہ غیرقانونی حملے سے آگاہ ہو اور اس کے باوجود تعاون کرے تو اسے بھی ذمہ دار ٹھہرایا جا سکتا ہے۔

رپورٹس کے مطابق برطانوی وزیر خارجہ ایووٹ کوپر نے اپنے حالیہ دورۂ امریکہ کے دوران امریکی سینیٹر مارکو روبیو سے ملاقات سے قبل اس بات پر زور دیا کہ ایران کے جوہری معاملے میں سفارتی راستہ اختیار کیا جانا چاہیے اور فوجی کشیدگی کے بجائے مذاکرات کو ترجیح دی جائے۔