ایران کے خلاف جنگ بھڑکی تو خلیج فارس میں تیل کی ترسیل خطرے میں پڑ جائے گی:حزب اللہ

?️ 8 فروری 2026

ایران کے خلاف جنگ بھڑکی تو خلیج فارس میں تیل کی ترسیل خطرے میں پڑ جائے گی: حزب اللہ

حزب اللہ لبنان کے سیاسی کونسل کے رکن محمود قماطی نے ایران کے خلاف کسی بھی ممکنہ فوجی مہم جوئی کے سنگین نتائج سے خبردار کرتے ہوئے کہا ہے کہ اگر ایران کے خلاف جنگ مسلط کی گئی تو خلیج فارس میں تیل کی برآمدات اور عالمی تجارت کو شدید نقصان پہنچے گا۔

محمود قماطی نے خطے کی تازہ صورتحال پر تبصرہ کرتے ہوئے کہا کہ آج پورا خطہ ایران کی جانب دیکھ رہا ہے اور یہ جاننے کا منتظر ہے کہ ایران کیا فیصلہ کرتا ہے، کیونکہ مزاحمتی محاذ کا مستقبل بڑی حد تک ایران میں ہونے والے فیصلوں سے جڑا ہوا ہے۔

انہوں نے مذاکرات کے عمل کی طرف اشارہ کرتے ہوئے کہا کہ ایران نے اپنے اصولی مؤقف پر ثابت قدمی دکھائی، مذاکرات کے مقام اور ایجنڈے کا خود تعین کیا اور بات چیت کو صرف جوہری معاملے تک محدود رکھا، جس کے نتیجے میں صہیونی وزیراعظم بنیامین نیتن یاہو کو ناکامی اور مایوسی کا سامنا کرنا پڑا۔

حزب اللہ رہنما نے کہا کہ ایران نے واضح کر دیا ہے کہ وہ ایک خودمختار اور طاقتور ملک ہے جو کسی دباؤ کو قبول نہیں کرتا اور اپنے دفاع کی مکمل صلاحیت رکھتا ہے۔

محمود قماطی نے خبردار کیا کہ اگر ایران کے خلاف جنگ چھیڑی گئی تو اس کے اثرات صرف ایران تک محدود نہیں رہیں گے بلکہ عالمی تجارت متاثر ہوگی اور خلیج فارس میں تیل کی ترسیل و برآمدات میں شدید خلل پیدا ہوگا، جس کے نتائج پوری دنیا کو بھگتنا پڑیں گے۔