امریکی عوام کا ٹرمپ پر اعتماد مزید کم ہو گیا

امریکی عوام کا ٹرمپ پر اعتماد مزید کم ہو گیا

 ایک نئی تحقیق سے ظاہر ہوا ہے کہ امریکی عوام کا سابق صدر اور موجودہ صدر ڈونلڈ ٹرمپ پر اعتماد مسلسل کم ہو رہا ہے۔ پیو ریسرچ سینٹر کی تازہ رپورٹ کے مطابق نہ صرف مجموعی عوامی اعتماد میں کمی آئی ہے بلکہ ریپبلکن ووٹرز کے اندر بھی ٹرمپ کی حمایت میں واضح کمی دیکھی گئی ہے۔

رپورٹ کے مطابق ٹرمپ اس وقت ملک بھر میں اپنی معاشی پالیسیوں اور کارکردگی کو اجاگر کرنے کی کوشش کر رہے ہیں، تاہم انہیں اپنی امیگریشن پالیسیوں کے باعث بڑھتی ہوئی عوامی بے چینی اور شہری احتجاج کا سامنا ہے۔ انہی عوامل کے نتیجے میں ان کی مقبولیت متاثر ہو رہی ہے۔

پیو کے سروے کے مطابق ڈونلڈ ٹرمپ کی مجموعی مقبولیت 37 فیصد پر آ گئی ہے، جو گزشتہ خزاں کے مقابلے میں تقریباً تین فیصد کم ہے۔

اسی طرح رائٹرز/ایپسوس کے حالیہ سروے میں ٹرمپ کی مقبولیت 39 فیصد ریکارڈ کی گئی، جو ان کے دوسرے صدارتی دور کی کم ترین سطح ہے۔ یہ شرح دسمبر کے آغاز میں 41 فیصد تھی۔

سروے میں یہ بھی بتایا گیا کہ ٹرمپ کی پالیسیوں پر عدم اطمینان میں اضافہ ہوا ہے۔ صرف 27 فیصد امریکی بالغوں نے کہا کہ وہ صدر کی پالیسیوں کی حمایت کرتے ہیں، جبکہ تقریباً ایک سال قبل، جب وہ دوبارہ وائٹ ہاؤس پہنچے تھے، یہ شرح 35 فیصد تھی۔

اعداد و شمار کے مطابق بڑی تعداد میں امریکیوں کا خیال ہے کہ موجودہ حکومت کے اقدامات سے حالات بہتر ہونے کے بجائے مزید خراب ہوئے ہیں۔ 2025 میں ٹرمپ کے صدارتی دور کے آغاز پر 67 فیصد ریپبلکنز نے کہا تھا کہ وہ ان کے بیشتر یا تمام خیالات کی حمایت کرتے ہیں، تاہم اب یہ شرح کم ہو کر 56 فیصد رہ گئی ہے۔

سروے میں یہ بھی سامنے آیا کہ 38 فیصد ریپبلکنز اور ریپبلکن جھکاؤ رکھنے والے آزاد ووٹرز کا خیال ہے کہ کانگریس میں ٹرمپ کے اتحادی قانون ساز ان کے خیالات کی حمایت کے پابند ہیں، جبکہ 61 فیصد ناقدین کا کہنا ہے کہ ریپبلکن اراکینِ کانگریس پر ٹرمپ کی پیروی لازم نہیں۔ یہ شرح گزشتہ سال کے پیو سروے میں 55 فیصد تھی۔

یہ نتائج اس بات کی نشاندہی کرتے ہیں کہ امریکی سیاست میں ڈونلڈ ٹرمپ کی پوزیشن کو اندرونی اور بیرونی سطح پر بڑھتے ہوئے چیلنجز کا سامنا ہے۔