امریکی سیکیورٹی اسٹریٹجی کے بعض حصے ناقابلِ قبول ہیں:جرمنی چانسلر

?️ 9 دسمبر 2025

امریکی سیکیورٹی اسٹریٹجی کے بعض حصے ناقابلِ قبول ہیں:جرمنی چانسلر

 جرمنی کے چانسلر فریڈرک مرٹس نے امریکا کی نئی قومی سلامتی کی حکمتِ عملی پر شدید تنقید کرتے ہوئے کہا ہے کہ اس دستاویز کے بعض حصے یورپی نقطۂ نظر سے ناقابلِ قبول ہیں۔

ڈوئچے ویلے کے مطابق مرٹس نے منگل کے روز کہا کہ یہ امریکی دستاویز اُن کے پہلے سے موجود مؤقف کی تصدیق کرتی ہے کہ یورپ اور خاص طور پر جرمنی کو اپنی سلامتی کی پالیسی میں امریکا پر انحصار کم کر کے زیادہ خودمختار ہونا چاہیے۔

انہوں نے مزید کہا ہمیں کوئی ضرورت نظر نہیں آتی کہ اب امریکی یورپ میں ہماری جمہوریت کو بچانے کی کوشش کریں۔ اگر ہماری جمہوریت کو کسی مدد کی ضرورت ہوگی تو ہم خود اس کے لیے کافی ہیں۔

مرٹس نے کہا کہ یہ نئی امریکی پالیسی دراصل کوئی نئی بات نہیں بلکہ انہی خیالات کا تسلسل ہے جو ڈونلڈ ٹرمپ کے نائب، جے ڈی وینس، نے فروری میں میونخ سیکیورٹی کانفرنس کے دوران پیش کیے تھے، جہاں انہوں نے جرمنی اور دیگر یورپی ممالک پر آزادیِ اظہار محدود کرنے اور اپوزیشن کو نظر انداز کرنے کے الزامات لگائے تھے۔

امریکی سلامتی کی نئی حکمتِ عملی میں بھی یورپی حکومتوں پر سیاسی آزادیوں کو کمزور کرنے اور اظہارِ رائے پر پابندیاں لگانے کا الزام عائد کیا گیا ہے، جسے جرمن چانسلر نے “غلط اور یورپی سیاسی حقائق سے دور قرار دیا۔

آخر میں مرٹس نے زور دیا کہ واشنگٹن کا یہ نیا رویہ یورپ کے لیے دفاع اور سلامتی کے شعبے میں مزید خودمختاری کی ضرورت کو واضح کرتا ہے۔