امارات نے اسرائیلی سفیر کو غیر مہذب رویے کی بنا پر ملک سے نکال دیا

امارات نے اسرائیلی سفیر کو غیر مہذب رویے کی بنا پر ملک سے نکال دیا

ابوظہبی میں تعینات اسرائیلی سفیر یوسف آبراہام شلی کو امارات میں "غیر شائستہ اور نامناسب رویے” کے باعث وطن واپس بلایا گیا ہے۔ اسرائیلی میڈیا نے تصدیق کی ہے کہ متحدہ عرب امارات نے اسرائیل کو باضابطہ طور پر آگاہ کیا تھا کہ وہ اس سفیر کو مزید قبول کرنے کے لیے تیار نہیں، جس کے بعد اسرائیلی حکومت نے اسے واپس بُلا لیا۔

اسرائیلی چینل 12 اور ویب سائٹ N12 کی رپورٹس کے مطابق، شلی نے حالیہ دنوں میں ابوظہبی کے ایک بار میں اسرائیلی شہریوں، بشمول خواتین، کے ساتھ شرکت کی اور ایسا رویہ اختیار کیا جو اماراتی حکام کے مطابق غیر قابل قبول تھا اور اماراتی وقار کو ٹھیس پہنچاتا ہے۔

یاد رہے کہ متحدہ عرب امارات نے 2020 میں امریکہ کی ثالثی میں ہونے والے "معاہدہ ابراہیم” کے تحت اسرائیل کے ساتھ تعلقات معمول پر لائے تھے۔ اس معاہدے کے بعد امارات اسرائیل کا قریبی عرب اتحادی بن کر ابھرا ہے، خاص طور پر ایسے وقت میں جب اسرائیل پر غزہ میں جنگ اور ممکنہ نسل کشی کے الزامات لگ رہے ہیں۔

شلی ماضی میں برازیل میں اسرائیل کے سفیر رہ چکے ہیں، جہاں وہ پہلے بھی دو مختلف اسکینڈلز کا مرکز بنے۔ ایک واقعے میں ان کی ایک تصویر سابق برازیلی صدر بولسونارو کے ساتھ سمندری کیکڑا (جو یہودی کوشر اصولوں کے مطابق حرام ہے) کھاتے ہوئے سامنے آئی تھی، جس پر شدید تنقید کی گئی۔

ایک اور واقعے میں ایک برازیلی خاتون نے الزام لگایا تھا کہ شلی نے ویزے کے بدلے ذاتی ملاقات کا مطالبہ کیا۔ خاتون نے بتایا کہ ویڈیو کال کے دوران شلی نازیبا حالت میں بستر پر لیٹے ہوئے نظر آئے اور اسے ذاتی ملاقات اور ڈنر کی دعوت دی، جسے خاتون نے ہراسانی قرار دیا۔

ان واقعات کے باوجود، شلی کو نومبر 2024 میں امارات میں اسرائیلی سفیر تعینات کیا گیا تھا۔ لیکن حالیہ غیر شائستہ رویے کے بعد اسرائیل کو اپنا سفیر واپس بلانے پر مجبور ہونا پڑا، جو دونوں ممالک کے درمیان تعلقات کے لیے ایک ناپسندیدہ لمحہ تصور کیا جا رہا ہے۔