اسرائیل کے سابق وزیر اعظم نے نیتن یاہو کو جھوٹا اور ٹرمپ کو ناسمجھ قرار دیا

?️ 17 اگست 2025

اسرائیل کے سابق وزیر اعظم نے نیتن یاہو کو جھوٹا اور ٹرمپ کو ناسمجھ قرار دیا

اسرائیل کے سابق وزیراعظم ایهود باراک نے موجودہ وزیراعظم بنیامین نیتن یاہو پر کڑی تنقید کرتے ہوئے کہا ہے کہ وہ سانس لینے جتنی آسانی سے جھوٹ بولتے ہیں اور ان کے قریبی ساتھی ڈونلڈ ٹرمپ بھی فوجی معاملات سے بالکل ناواقف ہیں۔

فلسطینی خبر رساں ایجنسی معا کے مطابق، باراک نے کہا کہ نیتن یاہو اب قومی سلامتی کی بجائے صرف اپنی ذاتی بقا اور سیاسی مستقبل کے بارے میں فکر مند ہیں۔ ان کے بقول، نیتن یاہو نے غیر ضروری جنگ چھیڑ کر اپنی کرپشن مقدمات اور حریدی یہودیوں کی فوجی سروس سے چھوٹ کے بحران سے فرار حاصل کرنے کی کوشش کی ہے۔

باراک نے الزام لگایا کہ نیتن یاہو نے ٹرمپ اور ان کے قریبی حلقے کو یہ باور کرایا کہ اسرائیل کے پاس صرف دو راستے ہیں یا تو حماس کے سامنے جھک جانا یا جنگ جاری رکھنا جب تک کہ حماس کا آخری جنگجو ختم نہ ہو جائے۔ انہوں نے کہا ٹرمپ نے عسکری معاملات کو کبھی نہیں سمجھا، وہ مکمل طور پر نیتن یاہو پر انحصار کرتے ہیں اور انہی کے جال میں پھنس گئے ہیں۔

سابق وزیراعظم کے مطابق، اس جنگ کے تسلسل سے صرف حماس کو فائدہ ہوگا، جبکہ اسرائیل مزید غزہ کے دلدل میں پھنس جائے گا اور اپنے اعلان کردہ اہداف یعنی حماس کی تباہی یا مغویوں کی رہائی میں کامیاب نہیں ہوگا۔

باراک نے کہا کہ اگرچہ ماضی کے اسرائیلی رہنماؤں سے اختلافات رہے ہیں لیکن وہ نہ بزدل تھے اور نہ جھوٹے۔ آج ہم ایسے لیڈر کے ماتحت ہیں جس نے اپنی سمت نما مکمل طور پر کھو دی ہے۔

خیال رہے کہ اسرائیل نے 7 اکتوبر 2023 سے غزہ پر جنگ مسلط کر رکھی ہے جس میں اب تک ہزاروں فلسطینی شہری، جن میں اکثریت خواتین اور بچوں کی ہے، شہید یا زخمی ہو چکے ہیں۔ بڑے پیمانے پر تباہی اور قحط کے باوجود اسرائیل اب تک اپنے مقاصد حاصل کرنے میں ناکام رہا ہے۔ اس کے برعکس، تل ابیب نے اقوام متحدہ کی سلامتی کونسل کی جنگ بندی قرارداد اور عالمی عدالت انصاف کے احکامات کو بھی نظرانداز کیا ہے اور نسل کشی پر مبنی کارروائیاں جاری رکھے ہوئے ہے۔