آخری لاش کی واپسی تک غزہ جنگ بندی کا دوسرا مرحلہ نہیں: بن گویر

?️ 1 جنوری 2026

آخری لاش کی واپسی تک غزہ جنگ بندی کا دوسرا مرحلہ نہیں: بن گویر

صہیونی حکومت کے وزیرِ داخلی سلامتی ایتامار بن گویر نے کہا ہے کہ جب تک غزہ سے آخری اسرائیلی اسیر کی لاش واپس نہیں لائی جاتی، اس وقت تک غزہ میں جنگ بندی کے دوسرے مرحلے پر عملدرآمد شروع نہیں کیا جانا چاہیے۔

عرب میڈیا کے مطابق بن گویر نے واضح کیا کہ اسرائیل کو اس وقت تک کوئی نیا قدم نہیں اٹھانا چاہیے جب تک آخری اسیر کی لاش واپس نہ آ جائے۔ ان کا کہنا تھا کہ یہ معاملہ ہر چیز پر مقدم ہے اور اس سے پہلے کسی بھی قسم کی پیش رفت قابلِ قبول نہیں۔

بن گویر نے مزید کہا کہ اسرائیل اس وقت تک کوئی اقدام نہیں کرے گا جب تک حماس کو مکمل طور پر غیر مسلح نہ کر دیا جائے۔ ان کے مطابق اس شرط کے بغیر کسی بھی سیاسی یا سکیورٹی عمل کو آگے نہیں بڑھایا جا سکتا۔

غزہ میں ممکنہ ترک فوجی موجودگی کے حوالے سے بن گویر نے امید ظاہر کی کہ وزیراعظم بنیامین نیتن یاہو نے ترکی کی جانب سے غزہ میں فوج تعینات کرنے کی کسی بھی تجویز کو مسترد کر دیا ہوگا۔ انہوں نے کہا کہ اسرائیل کے لیے یہ اقدام ناقابلِ قبول ہے۔

دوسری جانب اسرائیلی میڈیا نے انکشاف کیا ہے کہ بن گویر نے فلسطینی قیدیوں کے لیے ایک نیا جیل خانہ بنانے کی غیر معمولی تجویز پیش کی ہے، جس کے گرد مگرمچھ چھوڑے جائیں تاکہ فرار کی کوششوں کو روکا جا سکے۔ بن گویر نے اس منصوبے کو کم خرچ اور مؤثر قرار دیا اور دعویٰ کیا کہ امریکا کی ریاست فلوریڈا میں اس طرز کی مثال موجود ہے۔

رپورٹس کے مطابق اس تجویز پر ابتدائی طور پر حیرت کا اظہار کیا گیا، تاہم اسرائیلی جیل انتظامیہ نے بعد ازاں اس منصوبے کی عملی حیثیت جانچنے کے لیے ابتدائی مطالعات شروع کر دی ہیں، اگرچہ تاحال کوئی حتمی فیصلہ نہیں کیا گیا۔