صہیونی حکومت کا فلسطینی قیدی ڈاکٹر پر تشدد چھپانے کے لیے نیا دعویٰ

?️ 11 جولائی 2026

سچ خبریں:صہیونی حکومت نے فلسطینی ڈاکٹر حسام ابو صفیہ کی گرفتاری کو قانونی قرار دیتے ہوئے ان پر حماس سے وابستگی کا دعویٰ کیا، جبکہ اقوام متحدہ اور ان کے وکیل نے دوران حراست تشدد، طبی غفلت اور غیر انسانی سلوک پر شدید تشویش کا اظہار کیا ہے۔

صہیونی حکومت نے اپنے خلاف جنگی جرائم کے الزامات سے توجہ ہٹانے کی کوشش کے تحت فلسطینی قیدی ڈاکٹر حسام ابو صفیہ پر حماس سے وابستگی کا دعویٰ کیا ہے۔

 یہ دعویٰ ایسے وقت میں سامنے آیا ہے جب غزہ کے کمال عدوان اسپتال پر حملے اور ان کی گرفتاری کے حوالے سے بین الاقوامی سطح پر شدید تشویش پائی جا رہی ہے۔

صہیونی حکومت نے دعویٰ کیا ہے کہ فلسطینی ڈاکٹر حسام ابو صفیہ تحریک حماس میں کرنل کے عہدے پر فائز تھے اور ان کی گرفتاری قانونی بنیادوں پر عمل میں آئی۔

جنیوا میں صہیونی حکومت کے سفارتی مشن نے دوران حراست ان کی صحت بگڑنے سے متعلق رپورٹس کی بھی تردید کی۔

صیہونی سفارتی مشن کے بیان میں کہا گیا کہ ڈاکٹر حسام ابو صفیہ کو قابل اعتماد سکیورٹی معلومات کی بنیاد پر قانونی طور پر گرفتار کیا گیا اور وہ حماس میں کرنل کے منصب پر فائز تھے۔

بیان میں مزید کہا گیا کہ ابو صفیہ نے اپنی گرفتاری کے کسی بھی مرحلے میں شدید جسمانی خرابی کی کوئی علامت ظاہر نہیں کی۔

صیہونی مشن نے ان کی من مانی گرفتاری سے متعلق رپورٹس کو مسترد کرتے ہوئے دعویٰ کیا کہ ڈاکٹر حسام ابو صفیہ کمال عدوان اسپتال کو حماس کے ایک مرکز کے طور پر چلا رہے تھے۔

بیان میں مزید الزام عائد کیا گیا کہ انہوں نے اسپتال میں اپنی ذمہ داری سے فائدہ اٹھاتے ہوئے شہری مقاصد کے لیے مختص انسانی وسائل کو مبینہ طور پر عسکری مقاصد کے لیے استعمال کیا۔

صہیونی حکومت کا یہ ردعمل اقوام متحدہ کے حقائق جانچنے والے مشن کے اس بیان کے بعد سامنے آیا، جس میں ڈاکٹر حسام ابو صفیہ کی جان کے تحفظ پر شدید تشویش ظاہر کی گئی تھی۔

اقوام متحدہ کے چار آزاد ماہرین نے گزشتہ منگل کو جاری اپنے بیان میں کہا تھا کہ ڈاکٹر ابو صفیہ کی بغیر فرد جرم اور مقدمے کے مسلسل حراست اس بات کی عکاسی کرتی ہے کہ اسرائیل فلسطینی طبی عملے کو منظم انداز میں نشانہ بنا رہا ہے۔

بدھ کے روز مقبوضہ فلسطینی علاقوں میں انسانی حقوق کی صورتحال کی نگرانی کرنے والی اقوام متحدہ کی آزاد تحقیقاتی کمیٹی نے بھی ایک علیحدہ بیان جاری کیا، جس میں ڈاکٹر حسام ابو صفیہ کے ساتھ دوران حراست مسلسل اور سنگین خلاف ورزیوں کی قابل اعتماد اطلاعات پر گہری تشویش ظاہر کی گئی۔

کمیٹی نے ان کی فوری، محفوظ اور غیر مشروط رہائی کا مطالبہ کرتے ہوئے صیہونی حکام پر زور دیا کہ انہیں فوری طور پر آزاد اور غیر جانبدار طبی سہولتیں فراہم کی جائیں۔

تحقیقاتی کمیٹی نے کہا کہ ڈاکٹر ابو صفیہ کے ساتھ مبینہ بدسلوکی وسیع تر انسانی حقوق کی خلاف ورزیوں کے ایک سلسلے کا حصہ ہے۔

اس سے قبل غزہ کے کمال عدوان اسپتال کے سربراہ ڈاکٹر حسام ابو صفیہ کے وکیل نے انکشاف کیا تھا کہ انہیں زیر زمین کوٹھڑی میں غیر انسانی حالات میں رکھا گیا ہے، حالانکہ وہ دل کے عارضے میں مبتلا ہیں اور انہیں جسمانی و ذہنی تشدد کا سامنا ہے۔

ڈاکٹر حسام ابو صفیہ کے وکیل غید غانم قاسم نے اپنے حالیہ دورۂ ملاقات کے بعد بتایا کہ ان کے مؤکل کا وزن نمایاں طور پر کم ہو چکا ہے، جس کی وجہ سخت قید، نامناسب حالات اور صہیونی حکومت کی جانب سے طبی سہولتوں کی عدم فراہمی ہے۔

انہوں نے بتایا کہ ڈاکٹر ابو صفیہ کو مسلسل تیس منٹ تک شدید تشدد کا نشانہ بنایا گیا، جس کے دوران ان کے سینے، چہرے، سر اور گردن پر متعدد ضربیں لگائی گئیں، تاہم جیل انتظامیہ نے نہ تو انہیں علاج فراہم کیا اور نہ ہی کسی ماہر ڈاکٹر کے پاس منتقل کیا۔

وکیل کے مطابق ڈاکٹر حسام ابو صفیہ دل کی دھڑکن کی بے ترتیبی میں مبتلا ہیں اور انہیں دانستہ طبی غفلت کا سامنا ہے۔ شدید گرمی کے باوجود انہیں سردیوں کے کپڑے پہننے پر مجبور کیا جاتا ہے، جبکہ وہ تشدد، بھوک اور تنہائی کی قید بھی برداشت کر رہے ہیں۔

انہوں نے مزید بتایا کہ ڈاکٹر ابو صفیہ کو زیر زمین ایک ایسی کوٹھڑی میں رکھا گیا ہے جہاں سورج کی روشنی بالکل نہیں پہنچتی، جس کے باعث ان کی جسمانی اور ذہنی صحت مسلسل بگڑ رہی ہے۔