شمالی شام میں الجولانی کے خلاف مزدوروں کا شدید احتجاج

سچ خبریں:شمالی شام کے مختلف علاقوں میں الجولانی کے زیر تسلط علاقوں میں مزدوروں اور سرکاری ملازمین نے معاشی بدحالی  اور ہزاروں سرکاری ملازمین کی جبری برطرفی کے خلاف بڑے پیمانے پر احتجاجی مظاہرے کیے۔

الجزیرہ نیوز چینل کی رپورٹ کے مطابق، شمالی شام کے مختلف علاقوں میں الجولانی کے زیر تسلط علاقوں میں مزدوروں اور سرکاری ملازمین نے بڑے پیمانے پر احتجاجی مظاہرے کیے، جن میں ہزاروں مظاہرین نے سرکاری اداروں سے جبری برطرفیوں کے فیصلوں کو منسوخ کرنے کا مطالبہ کیا۔

یہ بھی پڑھیں: الجولانی کے سب وعدے جھوٹے ثابت؛ خاص طبقے کو نشانہ

الجولانی کی قیادت میں کام کرنے والی ہیئت تحریر الشام نے حالیہ دنوں میں سرکاری محکموں میں تنظیم نو کے نام پر ہزاروں ملازمین کو جبری طور پر برطرف کر دیا، جب کہ بعض کو تین ماہ کی جبری رخصت پر بھیج دیا۔

مزدوروں کی تنظیم جمہوری تبدیلی ورکنگ ایسوسی ایشن نے گزشتہ ماہ اعلان کیا تھا کہ انہوں نے شام کے مختلف صوبوں میں مظاہروں کو مربوط کرنے کے لیے کمیٹیاں تشکیل دی ہیں تاکہ مزدوروں اور سرکاری ملازمین کو درپیش مسائل پر متفقہ ردعمل دیا جا سکے۔

یہ احتجاج الجولانی کی حکومت کے خلاف بڑھتے ہوئے عدم اطمینان کا بھی مظہر ہے کیونکہ اس نے اقتدار سنبھالتے وقت سرکاری ملازمین کی تنخواہوں میں 400 فیصد اضافہ کرنے کا وعدہ کیا تھا مگر اب الٹا ہزاروں افراد کو بے روزگار کر دیا گیا ہے۔

اس صورتحال کے دوران، اقوام متحدہ نے شام میں روٹی کے بحران اور آٹے کی قلت پر گہری تشویش کا اظہار کیا ہے، جو مزدوروں اور عام شہریوں کے لیے مشکلات میں مزید اضافہ کر رہا ہے۔

مزید پڑھیں: دمشق کی اموی مسجد میں الجولانی کے عناصر کی مداخلت کی وجہ سے تنازع

شام میں معاشی بحران اور بے روزگاری میں اضافے کے ساتھ ساتھ الجولانی حکومت کی پالیسیاں عوامی غصے کو مزید بڑھا رہی ہیں اور مزدور تحریک کے وسیع ہونے کے امکانات مزید بڑھ گئے ہیں۔