کیا نیویارک میں نیتن یاہو اور الجولانی کی خفیہ ملاقات ہوگی؟ صہیونی میڈیا کا دعویٰ

سچ خبریں:صہیونی ذرائع ابلاغ نے انکشاف کیا ہے کہ اسرائیلی وزیراعظم بنیامین نیتن یاہو اور محمد الجولانی کے درمیان ستمبر میں نیویارک میں اقوام متحدہ کی جنرل اسمبلی کے موقع پر ممکنہ ملاقات متوقع ہے،دمشق نے اس امکان کو رد نہیں کیا۔

اسرائیلی ذرائع ابلاغ نے امکان ظاہر کیا ہے کہ وزیراعظم بنیامین نیتن یاہو اور شام میں متنازع شخصیت محمد الجولانی کے درمیان رواں سال ستمبر میں نیویارک میں اقوام متحدہ کی جنرل اسمبلی کے اجلاس کے موقع پر ایک ممکنہ ملاقات ہو سکتی ہے۔

یہ بھی پڑھیں:الجولانی کی صہیونی ریاست سے تعلقات بہتر بنانے کی پیشکش 

اماراتی نیوز ویب سائٹ ارم نیوز کے مطابق، اسرائیلی چینل کان نے ایک شامی ذریعے کے حوالے سے رپورٹ کیا ہے کہ دمشق حکومت اس ملاقات کے امکان کو مسترد نہیں کرتی۔

اس رپورٹ میں کہا گیا ہے کہ نیتن یاہو ستمبر میں امریکہ کا دورہ کریں گے، اور اس سفر کا ایک اہم محور شام کے ساتھ ممکنہ تعلقات کی بحالی ہوگا۔

رپورٹ کے مطابق، محمد الجولانی بھی نیویارک کا دورہ کرنے کا ارادہ رکھتے ہیں تاکہ وہ اقوام متحدہ کی جنرل اسمبلی کے اجلاس میں شرکت کر سکیں۔

شامی ذرائع نے انکشاف کیا ہے کہ دمشق اور تل ابیب کے درمیان براہِ راست مذاکرات جاری ہیں۔ ان مذاکرات میں شام کا اہم مطالبہ اسرائیل کی جنوبی شام سے مکمل پسپائی ہے، جب کہ جولان پہاڑیوں کا مسئلہ فی الحال ایجنڈے میں شامل نہیں کیا گیا۔ دمشق کا ماننا ہے کہ اس مسئلے کو اٹھانے کے لیے ابھی وقت مناسب نہیں۔

مزید پڑھیں: الجولانی کا تل ابیب کے لیے قیمتی تحفہ

واضح رہے کہ محمد الجولانی ماضی میں دہشت گرد تنظیم تحریر الشام کا سربراہ رہ چکا ہے اور اب شام کے بعض علاقوں میں خود کو ایک بااثر حکومتی چہرہ کے طور پر پیش کر رہا ہے۔