مقبوضہ کشمیر میں بھارتی مظالم کے خلاف برطانیہ کے تمام شہروں میں شدید مظاہرے کیئے گئے

?️ 18 اپریل 2021

لندن (سچ خبریں)  مقبوضہ کشمیر میں بھارتی مظالم کے خلاف برطانیہ کے تمام شہروں میں شدید مظاہرے کیئے گئے جن میں بھارت سے فوری طور پر کشمیر چھوڑ کر نکل جانے کا مطالبہ کیا گیا۔

تفصیلات کے مطابق حریت رہنما سید علی شاہ گیلانی کی اپیل پر کشمیریوں پر ڈھائے جانے والے بھارتی مظالم کے خلاف برطانیہ بھر میں احتجاجی مظاہر ے کیے گئے جس میں عالمی برادری سے مقبوضہ کشمیر میں بھارتی فوج کی جانب سے انسانی حقوق کی سنگین خلاف ورزیوں کانوٹس لینے کا مطالبہ کیا گیا۔

موصولہ اطلاعات کے مطابق کورونا کی حفاظتی تدبیر کو پیش نظر رکھتے ہوے پروگرامات چھوٹے پیمانے پر منعقد کیے گے، جمعہ کی نماز کے بعد برطانیہ کے تمام شہروں میں بھارت کے کشمیر میں مظالم کے خلاف احتجاجی مظاہرے کیے اور بھارت کو یہ پیغام بھیجا کہ وہ کشمیر پر بھارت کے ناجائز فوجی قبضہ کو تسلیم نہیں کرتے اور کشمیری اپنے پیدائشی حق، حق خوداردیت سے دستبردار نہیں ہوں گے۔

برمنگھم میں بھارتی قونصلیٹ کے باہر بھی احتجاجی مظاہرہ کیا گیا اور بھارتی قونصلیٹ حکام نے مظاہرین کی پٹیشن لینے سے انکار کردیا جس کے بعد مظاہرین نے بھارتی رویے کیخلاف بھی احتجاج کیا۔

دوسری جانب مقبوضہ کشمیر میں بھارتی فوج کی جانب سے وادی کے مختلف علاقوں میں محاصرے اور تلاشی کی کارروائیوں کا سلسلہ جاری ہے۔

ضلع پلوامہ کے علاقے دار گنائی گنڈ میں فوج کی فائرنگ سے ایک خاتون زخمی ہوگئی جسے سرینگر کے ایس ایم ایچ ایس اسپتال منتقل کردیا گیا جبکہ سری نگر کے علاقے مہجور نگر سے ایک لاش برآمد ہوئی ہے۔