امریکا کے تائیوان کے ساتھ روابط، چین نے شدید دھمکی دے دی

?️ 15 اپریل 2021

بیجنگ (سچ خبریں) تائیوان کے ساتھ امریکا کے بڑھتے ہوئے روابط اور نئی سازشوں کو مدنظر رکھتے ہوئے چین نے امریکا کو شدید دھمکی دیتے ہوئے خبردار کیا ہے کہ وہ آگ سے کھیلنا بند کردے۔

خبررساں اداروں کے مطابق امریکی صدر جو بائیڈن نے تائیوان کی حمایت میں غیر سرکاری وفد روانہ کیا ہے، جس پر بیجنگ حکومت نے سخت برہمی کا اظہار کرتے ہوئے امریکا کو شدید دھمکی دے دی ہے۔

چین نے تائیوان کے قریب جنگی مشقیں شروع کر رکھی ہیں اور بیجنگ حکومت نے ان مشقوں کو جنگ کی تیاری قرار دیا ہے۔

چینی وزارت خارجہ کے ترجمان جاؤ لیجان نے اپنے بیان میں کہا کہ امریکا تائیوان کے مسئلے پر آگ سے نہ کھیلے اور سرکاری سطح پر تائی پے حکومت سے پینگیں بڑھانا فوری طور پر بند کرے۔

انہوں نے کہا کہ امریکا کو تائیوان کی علاحدگی پسند قوتوں کو ورغلانے کی اجازت نہیں دے سکتے، کیوں کہ اس سے چین اور امریکا کے تعلقات متاثر ہوتے ہیں اور پورا آبنائے تائیوان خطرات میں گھر جائے گا۔

ذرائع ابلاغ کے مطابق چین نے تائیوان کے آس پاس سیکورٹی کا دائرہ بڑھا دیا ہے اورتقریبا ًہر روز اس کے طیارے تائیوان کی حدود میں پرواز کرتے ہیں۔

خیال رہے کہ منگل کے روز تائیوان کی وزارت دفاع نے چینی طیاروں کی طرف سے فضائی حدود کی خلاف ورزی شکایت کی تھی، اس سے قبل پیر کے روز 25 لڑاکا طیارے تائیوان کی حدود میں داخل ہوئے تھے،  امریکی وزیر خارجہ انتھونی بلنکن نے تائیوان کے خلاف چین کی جارحانہ کارروائیوں پر تشویش کا اظہار کیا تھا۔

یاد رہے کہ 1949 ء میں چین میں اقتدار میں آنے کے بعد سے حکمراں کمیونسٹ پارٹی نے تائیوان کی خود مختاری کو تسلیم نہیں کیا ہے۔