ٹرمپ کا غزہ منصوبہ اسرائیل اور امریکہ کی ذلت آمیز شکست کی تصدیق ہے: بحرینی رہنما

?️ 15 اکتوبر 2025

سچ خبریں:بحرین کی اپوزیشن تحریک کے رہنما راشد الراشد نے کہا کہ ٹرمپ کا غزہ منصوبہ دراصل اسرائیل اور امریکہ کی ذلت آمیز ناکامی پر مہرِ تصدیق ہے۔

بحرین کی اپوزیشن تحریک کے رہنما راشد الراشد نے کہا ہے کہ امریکی صدر ڈونلڈ ٹرمپ کا غزہ سے متعلق منصوبہ دراصل اسرائیل اور امریکہ کی ذلت آمیز شکست کی توثیق ہے۔

انہوں نے کہا کہ وہی امریکہ جس نے اسرائیل کے منصوبے کی حمایت کی تھی تاکہ فلسطینی مزاحمتی تحریک حماس کو ختم کیا جا سکے، آج اسی تحریک کے ساتھ مذاکرات کرنے اور جنگ بندی کے معاہدے تک پہنچنے پر مجبور ہو چکا ہے۔

یہ بھی پڑھیں:ٹرمپ کا غزہ منصوبہ ایک تباہی ہے:برطانوی اخبار

راشد الراشد کے مطابق، یہ ایک تاریخی شکست ہے ان قوتوں کے لیے جو حماس اور فلسطینی مزاحمت کو ختم کرنے کے خواب دیکھ رہی تھیں۔
ان کا کہنا تھا کہ یہ امریکہ ہے جو آج حماس کے ساتھ مذاکرات کی میز پر بیٹھنے پر مجبور ہوا ہے، اور یہ حماس اور تمام مزاحمتی قوتوں کے لیے ایک عظیم فتح ہے۔

انہوں نے کہا کہ مزاحمت کی فکر اور نظریہ اب کسی اکیڈمک یا نظریاتی نعرے کی صورت میں نہیں، بلکہ میدانِ عمل میں عملی حقیقت بن چکا ہے۔
مزاحمتی تحریک کے اس نظریے نے قاسم سلیمانی، سید حسن نصراللہ اور دیگر شہداء جیسے عظیم قائدین کی شکل میں عروج پایا ، جنہوں نے قدس کی آزادی اور فلسطین کی بازیابی کی راہ میں اپنی جانیں قربان کیں۔

راشد الراشد نے کہا کہ مزاحمت کی تمام کامیابیاں امام خمینیؒ کے افکار کا تسلسل ہیں، جنہوں نے رمضان کے آخری جمعے کو یوم القدس قرار دے کر فلسطین کی آزادی کی راہ دکھائی۔
انہوں نے کہا کہ اسلامی جمہوریہ ایران، امام خمینیؒ کے اسی راستے پر گامزن ہے، اور آج تمام مزاحمتی محاذ یہ محسوس کرتے ہیں کہ ایران ان کی مضبوط پشت پناہ ہے۔

ان کے مطابق، اگرچہ فلسطینی قوم نے بڑی قربانیاں دی ہیں ؛ شہداء کا خون، زخموں کا بوجھ، اور سنگین مالی قیمت مگر آزادی کا کوئی دوسرا راستہ نہیں۔
انہوں نے کہا کہ غزہ کی حالیہ فتح نے اسرائیل کو پوری دنیا کے سامنے رسوا کر دیا ہے، اسے ایک خونریز اور ظالم ریاست کے طور پر بے نقاب کر دیا گیا ہے جو دوسروں کی زمینوں پر قبضہ کرنے کے لیے خوفناک جرائم کا ارتکاب کرتی ہے۔

راشد الراشد نے اسرائیل کی جانب سے ایران، عراق اور دیگر خطے کے ممالک کو دی جانے والی دھمکیوں پر تبصرہ کرتے ہوئے کہا کہ یہ حکومت دراصل ایک کاغذی شیر ہے، اس نے دو سالہ جنگ میں فلسطینی مزاحمت کو شکست نہیں دی، یمن میں ناکام رہا، اور ایران کے خلاف حالیہ بارہ روزہ جنگ میں بھی ذلت آمیز شکست کھا کر مذاکرات کی بھیک مانگنے پر مجبور ہوا۔

مزید پڑھیں:ٹرمپ کا غزہ منصوبہ, عرب دنیا کے لیے ایک نیا امتحان

انہوں نے آخر میں کہا کہ آج مزاحمتی محاذ اپنی سچائی، قربانی اور اخلاص کے باعث ایک کے بعد ایک کامیابی حاصل کر رہا ہے اور اس نے فلسطین کے مسئلے کو ایک عالمی مسئلہ بنا دیا ہے۔