حزب اللہ کو غیر مسلح کرنے کا خواب دیکھنے والے ہوش کے ناخن لیں:حزب اللہ کے سکریٹری جنرل 

سچ خبریں:لبنان کی مزاحمتی تحریک حزب اللہ کے سکریٹری جنرل شیخ نعیم قاسم نے ایک واضح خطاب میں کہا ہے کہ جو لوگ حزب اللہ کی مزاحمتی قوت کو کمزور یا غیر مسلح کرنے کا خواب دیکھ رہے ہیں، انہیں چاہیے کہ یہ خام خیالی ترک کر دیں،یہ خطاب حالیہ سیاسی و دفاعی حالات کے تناظر میں المنار چینل کے ذریعے نشر کیا گیا۔

یہ بھی پڑھیں:حزب اللہ کو فوری طور پر غیرمسلح ہونا چاہیے:امریکہ

شیخ نعیم قاسم نے کہا کہ جو یہ سمجھتا ہے کہ مزاحمت کمزور ہو چکی ہے، وہ شدید غلط فہمی کا شکار ہے۔ ہم اپنے ملک، عزت اور سرزمین کے دفاع کے لیے پہلے سے زیادہ تیار اور مضبوط ہیں، اگر لبنانی حکومت کسی وجہ سے اپنی ذمہ داری پوری نہ کر پائے تو حزب اللہ دشمن کے خلاف ڈٹ کر کھڑی ہوگی۔

انہوں نے زور دے کر کہا کہ جو کوئی بھی حزب اللہ کو اسلحہ سے محروم کرنے کی بات کرتا ہے، دراصل وہ صہیونی دشمن کی خدمت کر رہا ہے۔ ایسے مطالبات فوج اور مزاحمت کے درمیان فتنہ پیدا کرنے کی کوشش ہیں۔

شیخ قاسم نے خبردار کیا کہ جو ہمارے اسلحے پر ہاتھ ڈالنے کی کوشش کرے گا، ہم اس کا سامنا پوری طاقت سے کریں گے۔ ہم ان لوگوں میں سے نہیں جو دبک کر بیٹھ جائیں۔ ہم وہ لوگ ہیں جنہیں دنیا کی کوئی طاقت شکست نہیں دے سکتی۔

انہوں نے انکشاف کیا کہ اسرائیل کا مقصد جنوبی لبنان پر قبضہ کر کے اسے فلسطینِ اشغالی کا حصہ بنانا ہے۔ خلع سلاح کی باتیں اسی منصوبے کا حصہ ہیں۔ اگر مزاحمت نہ ہوتی تو آج بھی قابض فوج جنوبی لبنان میں موجود ہوتی۔

شیخ نعیم قاسم نے حزب اللہ کی 40 سالہ جدوجہد کو سراہتے ہوئے کہا کہ لبنانی مزاحمت نے ایک افسانوی مثال قائم کی ہے جسے دنیا بھر میں تسلیم کیا جا رہا ہے۔ دنیا حیران ہے کہ نوجوان مجاہدین کیسے صہیونی طاقت کے سامنے ڈٹ کر کھڑے ہوئے۔

انہوں نے فلسطین کے لیے حزب اللہ کی حمایت کا اعادہ کرتے ہوئے کہا کہ ہم شہید سید نصر اللہ کے راستے پر چلتے رہیں گے اور فلسطینی عوام کی حمایت جاری رکھیں گے۔

انہوں نے صہیونی جارحیت، بالخصوص مسجد الاقصیٰ پر حملوں کی مذمت کرتے ہوئے اسلامی دنیا سے سوال کیا کہ اسلامی ممالک اس کھلی جارحیت پر خاموش کیوں ہیں؟

شیخ نعیم قاسم نے امریکہ کو بڑا شیطان قرار دیتے ہوئے کہا کہ لبنان ہرگز امریکی احکامات کے مطابق نہیں چلے گا۔

انہوں نے ایران اور امریکہ کے درمیان جاری مذاکرات پر تبصرہ کرتے ہوئے امید ظاہر کی کہ

 یہ بات چیت مثبت نتائج دے گی، جو علاقائی اور بین الاقوامی سطح پر فائدہ مند ہو گی۔

مزید پڑھیں:لبنانی حکومت حزب اللہ کے مکمل خلع سلاح کی ذمہ دار ہے:امریکہ  

آخر میں انہوں نے یمن کے عوام اور انصار اللہ کے رہنما سید عبدالملک الحوثی کو خراج تحسین پیش کیا اور کہا کہ

 یمنی عوام دنیا کی طرف سے امریکہ اور اسرائیل کے خلاف مزاحمت کی نمائندگی کر رہے ہیں۔