صہیونی وزیر نے فلسطینیوں کو کچلنے کے لیئے خطرناک منصوبہ بنانے کا اعلان کردیا

?️ 30 مئی 2021

تل ابیب (سچ خبریں) اسرائیلی وزیر برائے عوامی سلامتی نے فلسطینیوں کی جانب سے کیئے جانے والے مظاہروں کو کچلنے کے لیئے ایک نیا خطرناک منصوبہ تیار کیا ہے جس کے مطابق مقبوضہ شہروں میں بڑی تعداد میں اسرائیلی فوج کی تعیناتی کرکے فلسطینیوں کی جانب سے کیئے جانے والے مظاہروں کو دبایا جائے گا۔

تفصیلات کے مطابق صہیونی میڈیا نے مقبوضہ شہروں میں فلسطینیوں کے آئندہ مظاہروں کو ہر ممکن حد تک دبانے کے لئے صہیونی حکومت کے وزیر برائے عوامی سلامتی امیر اوہانا کے منصوبے کے بارے میں اطلاع دی ہے۔

اسرائیل کے ٹی وی چینل 12  نے اتوار کی صبح کو بتایا کہ اوہانا کے اس منصوبے میں تین سال کے عرصہ میں 5 ہزار پولیس افسران کی بھرتی اور تربیت کے ساتھ ساتھ موجودہ صورتحال میں فلسطینی مظاہروں کو روکنے کے لئے فوری طور پر 300 کی تعیناتی بھی شامل ہے۔

اس رپورٹ کے مطابق مقبوضہ شہروں میں فلسطینی مظاہرین سے نمٹنے کے لئے بارڈر ریزرو پولیس کی 5 یونٹیں تعینات کی جائیں گی۔

یروشلم پوسٹ کے مطابق، اوہانا، صیہونی حکومت کی داخلی سلامتی کی تنظیم شاباک کو فلسطینیوں کو دبانے کے لئے استعمال کرنے کا بھی ارادہ رکھتے ہیں، اور اس کا ایک کام ان لوگوں کو روکنا ہے جو سوشل میڈیا پر احتجاج کا مطالبہ کرتے ہیں۔

صہیونی وزیر نے اس منصوبے کی وضاحت کے بارے میں ایک بیان جاری کرتے ہوئے دعویٰ کیا ہے کہ انہیں ایک ایسے منصوبے کی ضرورت ہے جس سے فلسطینیوں کی جانب سے کیئے جانے والے مظاہروں کو شدت سے کچلا جاسکے۔

واضح رہے کہ اس سے قبل اسرائیلی فورسز نے مغربی کنارے کے شہر نابلس میں ایک مظاہرے کے دوران ایک فلسطینی نوجوان کو شہید کردیا۔

دوسری جانب مقبوضہ بیت المقدس کے شیخ الجراح علاقے میں فلسطینیوں کو ان کی اراضی سے بے دخل کرنے اور ان کی زمینوں پر ناجائز قبضہ کرنے کے صہیونی فیصلے سے مقبوضہ علاقوں میں کشیدگی بڑھ گئی اور مزاحمتی گروہوں نے صہیونی فیصلے پر شدید ردعمل کا اظہار کیا تھا۔

واضح رہے کہ غزہ پر حالیہ اسرائیلی بمباری میں 253 فلسطینی شہید ہوئے جن میں 66 بچے تھے، جبکہ 1900 سے زائد افراد زخمی ہوگئے تھے۔

دوسری جانب حماس کے اسرائیل پر راکٹ حملوں میں 12 افراد ہلاک ہوئے جن میں 2 غیرملکی افراد اور 2 بچے شامل تھے جبکہ حماس کے ان حملوں کو روکنے کے لیئے اسرائیلی آئرن ڈوم شدت سے ناکام ہوگیا اور فلسطینینوں کی جانب سے فائر کیئے جانے والے میزائل اسرائیل کے متعدد شہروں تک پہونچ گئے تھے۔