کورونا وائرس کی اصل وجہ چینی لیبارٹری؛ وائٹ ہاؤس کا دعوی 

سچ خبریں:امریکی حکومت نے چین کے ساتھ جاری تجارتی کشیدگی کے دوران اپنی سرکاری ویب سائٹ پر ایک نیا صفحہ شامل کیا ہے، جس میں کووِڈ-19 کی ابتدا کو لیبارٹری سے لیک ہونے والے مواد کو قرار دیا گیا ہے۔ 

فرانسیسی نشریاتی ادارے فرانس 24 کی رپورٹ کے مطابق، وائٹ ہاوس کی ویب سائٹ covid.gov پر شائع کیے گئے اس صفحے پر نمایاں انداز میں LAB LEAK یعنی لیبارٹری سے لیک کے الفاظ درج ہیں، جن کے درمیان سابق امریکی صدر ڈونلڈ ٹرمپ کی تصویر بھی شامل ہے۔

یہ بھی پڑھیں:کورونا اور انفلوئنزا کی وباء کے باوجود فرانسیسی ڈاکٹروں کی ہڑتال میں توسیع

اس صفحے میں دعویٰ کیا گیا ہے کہ کورونا وائرس کا اصل منبع چین کا شہر ووہان ہے، جہاں یہ وائرس سب سے پہلے سامنے آیا، اور جہاں موجود لیبارٹری میں حیاتیاتی تحفظ کے ناقص انتظامات کے تحت تجربات جاری تھے۔

وائٹ ہاؤس نے اس صفحے کے ذریعے میڈیا، امریکی طبی حکام، سیاستدانوں اور خاص طور پر ڈاکٹر انتھونی فاوچی کو تنقید کا نشانہ بنایا ہے، جنہوں نے وبا کی قدرتی ابتداء کے بیانیے کو فروغ دیا۔ صفحے میں لکھا گیا ہے کہ یہ عناصر اپنے پسندیدہ بیانیے کو تھوپنے کی کوشش کر رہے ہیں، جو وائرس کی قدرتی منتقلی کو اصل قرار دیتا ہے۔

یہ بھی کہا گیا ہے کہ سی آئی اے کے نئے ڈائریکٹر جان ریٹکلف نے رواں سال کے آغاز میں عہدہ سنبھالتے ہی اس خفیہ ادارے کے کورونا سے متعلق مؤقف کو تبدیل کرتے ہوئے لیبارٹری لیک تھیوری کو فروغ دینا شروع کیا۔

اس نئی حکومتی پوزیشن کے ساتھ ساتھ یہ بھی نشاندہی کی گئی ہے کہ وبا کے دوران عائد کی گئی احتیاطی پابندیاں جیسے ماسک، سوشل ڈسٹینسنگ اور قرنطینہ غلط قرار دی جا چکی ہیں۔

یہ تمام اقدامات ایک ایسے وقت میں سامنے آ رہے ہیں جب امریکہ اور چین کے درمیان تجارتی محاذ آرائی عروج پر ہے، موجودہ امریکی صدر نے چینی مصنوعات پر 145 فیصد تک کے بھاری ٹیکسز عائد کیے ہیں، جس کے جواب میں چین نے بھی امریکی درآمدات پر 125 فیصد تک محصولات لگا دیے ہیں۔

مزید پڑھیں:کورونا وائرس سے بازوؤں میں بلڈ کلاٹ  کا انکشاف

دوسری جانب، چین نے ان الزامات کو سختی سے مسترد کرتے ہوئے کہا ہے کہ کورونا کی ابتداء پر تحقیق کی حمایت کرتا ہے، لیکن لیبارٹری سے لیک کے الزامات کو غیر معتبر اور سیاسی محرکات پر مبنی قرار دیتا ہے۔