فلسطینی قوم مزید ذلت قبول نہیں کرے گی، مزاحمت ہی واحد راستہ ہے؛حماس کا اعلان

سچ خبریں:فلسطین پر قبضے (نکبہ) 77ویں برسی کے موقع پر حماس نے عہد کیا ہے کہ فلسطینی قوم نیا نکبہ برداشت نہیں کرے گی، فلسطین کی آزادی اور وطن واپسی کا واحد راستہ مزاحمت ہے۔

حماس نے فلسطین پر قبضے (نکبہ) کی 77ویں برسی کے موقع پر جاری ایک بیان میں کہا ہے کہ فلسطینی قوم اب کسی بھی نئے نکبے یا جبری نقل مکانی کو برداشت نہیں کرے گی اور فلسطین کی آزادی اور فلسطینیوں کی واپسی صرف مزاحمت کے ذریعے ہی ممکن ہے۔

یہ بھی پڑھیں:فلسطین؛ یوم نکبہ سے یوم مزاحمت تک

حماس نے اس موقع پر شہدائے فلسطین خصوصاً جنگ "طوفان الاقصیٰ” کے شہدا کو خراج عقیدت پیش کرتے ہوئے کہا کہ شہداء کا خون فلسطینی قوم کے لیے مشعل راہ اور جدوجہد کا سرمایہ ہے۔

بیان میں مزید کہا گیا ہے کہ اسرائیلی حکومت کی جانب سے گزشتہ دو سالوں کے دوران غزہ، مغربی کنارے اور القدس میں فلسطینی عوام پر خوفناک جرائم اور نسل کشی کے باوجود فلسطینی قوم کی بہادرانہ مزاحمت نے دشمن کے تمام منصوبے ناکام بنا دیے ہیں۔

حماس نے اپنے بیان میں متعدد نکات پر زور دیا ہے:

1۔ فلسطینی سرزمین پر قابض اسرائیلی حکومت کی کوئی قانونی حیثیت نہیں ہے اور فلسطینی قوم اپنی سرزمین کی مکمل آزادی تک مزاحمت جاری رکھے گی۔

2۔ قومی اتحاد اور مشترکہ حکمت عملی کا قیام فوری ضرورت ہے، خصوصاً ایسے وقت میں جب فلسطینی مسئلہ بڑے چیلنجز سے گزر رہا ہے۔

3۔ فلسطین پر 77 سالہ اسرائیلی قبضہ اور غزہ میں حالیہ جرائم امریکہ اور مغرب کی جانبداری کو عیاں کرتے ہیں۔

4۔ القدس اور مسجد اقصیٰ فلسطینی جدوجہد کا مرکز ہیں، اسرائیل کو یہاں کوئی قانونی حیثیت حاصل نہیں ہے اور القدس ہمیشہ فلسطین کا ابدی دارالحکومت رہے گا۔

5۔ فلسطینی پناہ گزینوں کی حالت زار کا براہ راست ذمہ دار اسرائیل ہے اور ان پناہ گزینوں کی واپسی ایک ناقابل تنسیخ حق ہے۔

6۔ فلسطینی قیدیوں کے حقوق کے تحفظ کے لیے عالمی برادری فوری اقدامات کرے اور اسرائیل کی قیدیوں کے خلاف جرائم کو روکے۔

7۔ عرب اور اسلامی ممالک کی وحدت فلسطین کے لیے اسٹریٹجک گہرائی ہے، اور اسرائیل سے تعلقات معمول پر لانا ان ممالک کے مفاد کے خلاف ہے۔

مزید پڑھیں:کوئی بھی فلسطینیوں پر دوسرا یوم نکبہ مسلط نہیں کر سکتا؛ اسرائیل کو 100 ارب ڈالر جرمانہ ادا کرنا ہوگا:ترکی

8۔ لبنان، یمن اور عراق سمیت عالمی سطح پر فلسطین کے ساتھ اظہار یکجہتی کرنے والوں کی حمایت کو سراہا گیا اور اس حمایت کو جاری رکھنے کی اپیل کی گئی ہے۔