ایران کے خلاف صیہونی پالیسی میں نمایاں تبدیلی  

سچ خبریں:صہیونی وزیر خارجہ گدعون ساعر نے حالیہ بیان میں ایران کے خلاف عسکری اقدامات کے بجائے سفارتی راستے کو ترجیح دینے کی بات کی ہے، جسے ماہرین تل ابیب کی حالیہ پالیسی میں ایک نمایاں تبدیلی قرار دے رہے ہیں۔

لبنانی نیوز چینل المیادین کے مطابق صہیونی وزیر خارجہ  گدعون ساعر نے برطانوی اخبار دی ٹیلیگراف کو دیے گئے انٹرویو میں کہا کہ

اگر ایران کو جوہری ہتھیار بنانے سے روکنے کے لیے سفارتی راستہ مؤثر ثابت ہوتا ہے، تو ہمیں اس پر کوئی اعتراض نہیں۔

گدعون ساعر کے اس بیان کے تناظر میں یہ بات قابل ذکر ہے کہ ایران کی تمام ایٹمی سرگرمیاں پُرامن مقاصد کے لیے ہیں اور یہ مکمل طور پر بین الاقوامی معاہدوں اور آئی اے ای اے (عالمی ایٹمی توانائی ایجنسی) کے زیرِ نگرانی انجام پا رہی ہیں، ایران متعدد بار اس بات پر زور دے چکا ہے کہ وہ جوہری ہتھیار بنانے کا کوئی ارادہ نہیں رکھتا۔

اسرائیلی وزیر خارجہ نے ان رپورٹس کو بھی مسترد کر دیا جن میں دعویٰ کیا گیا تھا کہ سابق امریکی صدر ڈونلڈ ٹرمپ نے مبینہ طور پر اسرائیل کو ایران پر حملہ کرنے سے روکا تھا۔

گدعون ساعر نے کہا کہ میں بطور سلامتی کابینہ کا رکن تمام نجی نشستوں میں شریک رہا ہوں اور مجھے ایسا کوئی فیصلہ یاد نہیں جس میں ایران پر حملے کا حکم دیا گیا ہو۔

یہ بیان اس پس منظر میں آیا ہے جب اسرائیل ماضی میں بارہا ایران کو فوجی حملے کی دھمکی دے چکا ہے، خاص طور پر ایران کی ایٹمی تنصیبات کو نشانہ بنانے کے حوالے سے۔

مزید پڑھیں:ایران-امریکہ تعلقات اور دفاعی و مزاحمتی آپشنز  

 لیکن حالیہ بیانات سے اشارہ ملتا ہے کہ اسرائیلی قیادت اب اپنی حکمتِ عملی پر نظرثانی کر رہی ہے، جو یا تو داخلی دباؤ، عالمی سیاسی ماحول یا خطے کی بدلتی صورتحال کا نتیجہ ہو سکتا ہے۔