متعدد شامی شہروں کا جولانی حکومت کے مظالم کے خلاف بین الاقوامی اقدامات کا مطالبہ

?️ 15 جنوری 2025

سچ خبریں:ذرائع نے انکشاف کیا ہے کہ شام کے 9 شہروں کی ممتاز شخصیات، جن میں اکثریت علوی شہریوں کی ہے، جولانی کی دہشت گرد حکومت کے مظالم کے خلاف بین الاقوامی حمایت حاصل کرنے کے لیے سنجیدہ اقدامات کر رہی ہیں۔

المعلومہ نیوز ایجنسی کی رپورٹ کے مطابق شام کے طرطوس، لاذقیہ، اور جبله جیسے شہروں نے جولانی کی دہشت گرد حکومت کے مظالم کے خلاف بین الاقوامی برادری کی توجہ مبذول کرانے کے لیے اقدامات کیے ہیں۔

یہ بھی پڑھیں: الجولانی کے سابق مرکز میں اجتماعی قبریں دریافت

ان شہروں کے رہائشیوں کا کہنا ہے کہ جولانی حکومت کے جرائم نے علوی برادری کو خاص طور پر نشانہ بنایا ہے، جس کے نتیجے میں گزشتہ ہفتوں میں کم از کم 300 علوی شہری قتل ہوئے اور 500 سے زائد افراد لاپتہ ہیں، مزید یہ کہ پانچ ہزار علوی شہری جولانی حکومت کی جیلوں اور حراستی مراکز میں قید ہیں۔

علوی برادری کے شیوخ اور ممتاز شخصیات نے ان مظالم پر سخت ردعمل ظاہر کرتے ہوئے خبردار کیا ہے کہ دہشت گردوں کی ان کارروائیوں کا مقصد شام کے سیاسی عمل میں علوی برادری کو مکمل طور پر بے دخل کرنا ہے۔

ایک ماہ سے جولانی کے دہشت گرد گروپ ہیئت تحریر الشام کی حکمرانی کے بعد، شام کے سول سوسائٹی کے کارکنان نے ایک خط کے ذریعے جولانی کو مخاطب کیا ہے اور ملک کی موجودہ صورتحال پر گہری تشویش کا اظہار کیا ہے۔

اس خط میں قانونی خلا کی جانب اشارہ کرتے ہوئے کہا گیا ہے کہ شام میں عبوری دور کے لیے فوری طور پر قوانین کا نفاذ ضروری ہے تاکہ شہری حقوق اور آزادیوں کا تحفظ یقینی بنایا جا سکے۔

سول سوسائٹی کے کارکنان نے مطالبہ کیا کہ شام میں ماہرین قانون اور قانونی مشیروں کو نئے قوانین تیار کرنے کے لیے متحرک کیا جائے۔

مزید پڑھیں: الجولانی کا تل ابیب کے لیے قیمتی تحفہ

تاہم، جولانی نے ایک حالیہ انٹرویو میں کہا کہ شام میں صدارتی انتخابات اور آئین سازی میں کئی سال لگ سکتے ہیں، جس نے بین الاقوامی برادری اور شامی شہریوں میں مزید تشویش پیدا کر دی ہے۔