صیہونیوں کے ہاتھوں فلسطینی صحافیوں کے خیمے دوبارہ نذرِ آتش

?️ 6 جون 2025

سچ خبریں:صیہونی افواج نے غزہ میں واقع اسپتال کے نزدیک فلسطینی صحافیوں کے خیمے کو دوبارہ آگ لگا دی، جس کے نتیجے میں 3 صحافی شہید ہو گئے، یہ اسپتال آٹھویں بار صہیونی حملے کا نشانہ بنا جس کے بعد عالمی سطح پر غم و غصہ بڑھ رہا ہے۔

الجزیرہ نیوز چینل کی رپورٹ کے مطابق صیہونی فوج نے ایک بار پھر فلسطینی صحافیوں کو نشانہ بنایا ہے ، غزہ شہر میں واقع اسپتال المعمدانی کے اطراف میں قائم صحافیوں کا خیمہ صیہونی حملے کا نشانہ بن گیا، جس کے نتیجے میں تین صحافی شہید ہو گئے۔

یہ بھی پڑھیں:2000 سے اب تک صیہونیوں کے ہاتھوں 46 فلسطینی صحافیوں کی شہادت

الجزیرہ کے مطابق، یہ حملہ جان بوجھ کر صحافتی مرکز کو نشانہ بنا کر کیا گیا، جہاں صحافی زخمیوں کی کوریج، اسپتال کی حالت اور جنگی حالات پر رپورٹنگ کر رہے تھے۔

یہ پہلا واقعہ نہیں ہے، اس سے قبل بھی فلسطینی صحافیوں کے خیمے کو آگ لگا دی گئی تھی اور اس دردناک منظر کو کیمرے کی آنکھ نے محفوظ کیا تھا، جس میں ایک صحافی شعلوں کے درمیان جلتا دکھائی دیا،یہ تصویریں عالمی میڈیا اور انسانی حقوق کے حلقوں میں شدید غصے، غم اور مذمت کا باعث بنیں۔

الجزیرہ کی رپورٹ میں یہ بھی بتایا گیا ہے کہ اسپتال المعمدانی کو جنگ کے آغاز سے اب تک آٹھ بار نشانہ بنایا جا چکا ہے،یہ اسپتال نہ صرف غزہ کے شہریوں کے لیے ایک طبی مرکز ہے بلکہ صحافیوں اور امدادی اداروں کا محفوظ مقام بھی سمجھا جاتا رہا ہے تاہم صیہونی حملے بار بار اس مرکز کو بھی تباہ کرنے پر تلے ہوئے ہیں۔

اسرائیل کی جانب سے صحافیوں کو مسلسل نشانہ بنانا نہ صرف بین الاقوامی قوانین بلکہ انسانی اقدار کی بھی کھلی خلاف ورزی ہے۔

مزید پڑھیں:اسرائیل کی جانب سے فلسطینی صحافیوں پر ظلم و تشدد جاری، متعدد صحافیوں کو گرفتار کرلیا گیا

اقوام متحدہ، رپورٹرز وِدآؤٹ بارڈرز، اور دیگر انسانی حقوق کی تنظیمیں ان واقعات پر مسلسل اظہارِ تشویش کر رہی ہیں، مگر اسرائیل کی پالیسی میں کوئی تبدیلی نہیں آئی۔

اسرائیل, غزہ, فلسطین, صحافیوں کا قتل, خیمے کو نذر آتش, اسپتال المعمدانی, صہیونی حملہ, جنگی جرائم, میڈیا پر حملہ, انسانی حقوق, جنگ غزہ, فلسطینی صحافت, اسرائیلی جارحیت