نوری المالکی دوبارہ عراق کی حزب الدعوۃ الاسلامیہ پارٹی کے سکریٹری جنرل منتخب

سچ خبریں:عراق کی اسلامی سیاسی جماعت حزب الدعوۃ الاسلامیہ نے اپنے انیسویں مرکزی اجلاس میں نوری المالکی کو ایک بار پھر پارٹی کا سیکرٹری جنرل منتخب کر لیا ہے،نوری المالکی عراق کے سابق وزیر اعظم اور دولة القانون اتحاد کے سربراہ بھی ہیں۔

یہ بھی پڑھیں:عراقی حکومت کی تشکیل کے بارے میں نوری المالکی کا تازہ ترین تبصرہ

عراقی سرکاری خبر رساں ایجنسی واع کی رپورٹ کے مطابق عراق کی اسلامی سیاسی جماعت حزب الدعوۃ الاسلامیہ نے اپنے انیسویں مرکزی اجلاس میں نوری المالکی کو ایک بار پھر پارٹی کا سیکرٹری جنرل منتخب کر لیا ہے، یہ انتخاب پارٹی کے انیسویں اجلاس کے دوران عمل میں آیا، جس میں پارٹی رہنماؤں نے متفقہ طور پر نوری المالکی کی قیادت پر اعتماد کا اظہار کیا۔

نوری المالکی 2006 سے 2014 تک عراق کے وزیر اعظم رہے، ان کا دور حکومت عراق کی جدید تاریخ کے سب سے زیادہ پر تناؤ ادوار میں شمار ہوتا ہے کیونکہ اس دوران نہ صرف امریکی افواج کا انخلاء (2011) عمل میں آیا بلکہ داعش نے بھی 2014 میں عراق پر شدید حملے کیے۔

دوسری جانب، عراق کی حکومت نے حالیہ دنوں میں اعلان کیا ہے کہ آئندہ پارلیمانی انتخابات 11 نومبر 2025 کو منعقد ہوں گے،نوری المالکی، جو کہ اس وقت بھی ائتلاف دولت قانون کے سربراہ ہیں، نے حال ہی میں خبردار کیا ہے کہ انتخابات میں کسی بھی قسم کی تاخیر یا منسوخی نہ صرف پارلیمان کے خاتمے کا باعث بنے گی بلکہ ملک کو تقسیم اور فتنہ کی طرف بھی دھکیل سکتی ہے۔

ایک حالیہ انتخاباتی تقریب سے خطاب کرتے ہوئے المالکی نے کہا کہ انتخابات کا انعقاد ایک شرعی، انسانی اور اخلاقی ذمہ داری ہے، اور یہی عوام کو اپنی حکمرانی کے حق تک پہنچنے کا ذریعہ ہے۔

مزید پڑھیں:عراق کی سیاسی پیش رفت کے بارے میں نوری المالکی کا بیان

انہوں نے زور دے کر کہا کہ ہم کسی صورت انتخابات کے التوا کو قبول نہیں کریں گے کیونکہ اس صورت میں موجودہ پارلیمان کی مدت ختم ہو جائے گی اور اس کے بعد نہ اس کی کوئی قانونی حیثیت باقی رہے گی اور نہ ہی اس کی سرگرمیوں کا کوئی جواز ہوگا،  آئین بھی معطل ہو جائے گا اور ایسی صورت میں پارلیمان کی تحلیل صرف عدلیہ کے حکم کے ذریعے ہی ممکن ہو سکے گی۔