نیتن یاہو کی برطرفی صہیونی معاشرے کے لیے ناگزیر ہے؛صیہونی کنست رکن کا مطالبہ

?️ 6 ستمبر 2026

سچ خبریں:صہیونی حکومت کے مخالف کنست رکن گیلاد کاریو نے بنیامین نیتن یاہو کی برطرفی کا مطالبہ کرتے ہوئے کہا ہے کہ ان کی برطرفی صہیونی معاشرے کی ایک ناگزیر ضرورت ہے۔

صہیونی حکومت کی پارلیمنٹ کنست کے ایک اپوزیشن رکن نے وزیر اعظم بنیامین نیتن یاہو کی برطرفی کا مطالبہ کرتے ہوئے کہا ہے کہ انہوں نے اپنی مکمل نااہلی ثابت کردی ہے۔

کنست کے اپوزیشن رکن گیلاد کاریو نے صہیونی حکومت کے وزیر اعظم بنیامین نیتن یاہو کو عہدے سے ہٹانے کا مطالبہ کیا اور ان کی برطرفی کو صہیونی  معاشرے کی ناگزیر ضرورت قرار دیا۔

انہوں نے نیتن یاہو پر الزام عائد کیا کہ انہوں نے کئی مرتبہ اسرائیل کی سلامتی کو نظر انداز کیا اور داخلی سلامتی کے انتظام میں مکمل نااہلی کا مظاہرہ کیا ہے۔

کاریو نے کہا: ایسے شخص کو یہ اجازت نہیں ہونی چاہیے کہ وہ ہمارے مستقبل اور ہمارے بچوں کے مستقبل کے بارے میں کوئی فیصلہ کرے۔ انہوں نے مزید کہا کہ نیتن یاہو کو وزارت عظمیٰ سے ہٹانا صہیونی  معاشرے کی ناگزیر ضرورت ہے۔

اپوزیشن جماعتیں اور صہیونی  عوام کے وسیع حلقے 7 اکتوبر 2023 کے حملے سے متعلق ناکامیوں کی تحقیقات کے لیے ایک تحقیقاتی کمیشن تشکیل دینے کا مطالبہ کرتے رہے ہیں، تاہم نیتن یاہو نے اس طریقہ کار کو مسترد کرتے ہوئے اس کے بجائے ایسے کمیشن کی تشکیل کی حمایت کی ہے جس کے ارکان سیاسی طور پر مقرر کیے جائیں۔

کنست کے انتخابات 27 اکتوبر کو ہونے والے ہیں اور رائے عامہ کے جائزوں کے مطابق نیتن یاہو اور ان کی جماعت لیکوڈ  اپنی مقبولیت اور سیاسی پوزیشن کھو رہے ہیں۔

دوسری جانب نیتن یاہو کے خلاف بدعنوانی کے الزامات میں مقدمہ جاری ہے، جبکہ غزہ کی پٹی میں جنگی جرائم اور انسانیت کے خلاف جرائم کے الزامات کے باعث وہ بین الاقوامی فوجداری عدالت کی جانب سے بھی مطلوب ہیں۔

غزہ میں اکتوبر 2023 سے جاری صہیونی  جنگ میں 73000 سے زائد فلسطینی شہید ہوچکے ہیں، جبکہ امریکہ کی ثالثی میں جنگ بندی کے باوجود صہیونی  حملے بدستور جاری ہیں۔