ایران کے بیلسٹک میزائلوں کو روکنا ناممکن ہے؛ امریکی ماہر کا اعتراف

?️ 15 جون 2026

سچ خبریں:ایک امریکی ماہر نے اعتراف کیا ہے کہ ایران کے پاس ایسی مکمل نسل کے جدید بیلسٹک میزائل موجود ہیں جنہیں روکنا ممکن نہیں۔

امریکی دفاعی ماہر تھیوڈور پوسٹول نے اعتراف کیا ہے کہ ایران جدید نسل کے ایسے بیلسٹک میزائلوں کا حامل ہے جنہیں روکنا تقریباً ناممکن ہے، جبکہ انہوں نے صہیونی فضائی دفاعی نظام کی کارکردگی پر بھی سوالات اٹھائے۔

المیادین نیوز چینل کی رپورٹ کے مطابق پینٹاگون میں امریکی بحریہ کے سربراہ برائے آپریشنز کے سابق مشیر اور ایم آئی ٹی ادارے کے پروفیسر تھیوڈور پوسٹول نے ایران کی فوجی صلاحیتوں میں اضافے کا اعتراف کرتے ہوئے کہا کہ ایرانی بیلسٹک میزائل توقعات سے کہیں زیادہ درست اور تباہ کن ثابت ہوئے ہیں۔

پوسٹول نے کہا کہ ایرانیوں کے بیلسٹک میزائل اپنی کارکردگی کے اعتبار سے غیر معمولی ہیں اور ان کی صلاحیت اس سے کہیں زیادہ ہے جو میں نے ابتدا میں یا جون ۲۰۲۵ کی جنگ کے دوران دیکھی تھی۔ یہ میزائل اسرائیل کے لیے انتہائی اہم تزویراتی اہداف کو شدید نقصان پہنچا رہے ہیں۔

ایران کے بیلسٹک میزائلوں کو روکنا ناممکن

انہوں نے ایک ٹیلی ویژن انٹرویو میں اعتراف کیا کہ تل ابیب کو تہران کی جانب سے پہنچنے والے ممکنہ نقصانات کے بارے میں ان کا سابقہ اندازہ غلط ثابت ہوا، کیونکہ ایران نے جدید اور زیادہ مؤثر میزائلوں کی ایک مکمل نئی نسل متعارف کرائی ہے جنہیں روکنا ناممکن ہے۔

پوسٹول نے زور دے کر کہا: ان میزائلوں کو کسی بھی صورت میں روکا نہیں جا سکتا۔ یہ بڑے اور زیادہ تباہ کن وارہیڈ لے جاتے ہیں۔ ایران کے پاس ان میزائلوں کی بڑی تعداد موجود ہے جو انتہائی درستگی کے ساتھ اپنے اہداف کو نشانہ بناتے ہیں، جس کے باعث مخصوص اہداف پر مرکوز حملے بھی ممکن ہو جاتے ہیں۔

انہوں نے ایرانی بیلسٹک میزائلوں کے مقابلے میں صہیونی فضائی دفاعی نظام کی کارکردگی کو "احمقانہ” قرار دیتے ہوئے کہا کہ یہ نظام عملی طور پر ایرانی میزائلوں کا مؤثر مقابلہ کرنے کی کوئی نمایاں صلاحیت نہیں رکھتے۔

تل ابیب مشرق وسطیٰ کا سب سے بڑا جوہری خطرہ

اس امریکی ماہر نے اس بات پر زور دیا کہ صہیونی حکومت مشرق وسطیٰ میں سب سے بڑا جوہری خطرہ ہے۔ انہوں نے صیہونی وزیر اعظم بنیامین نیتن یاہو کو لبنان کی موجودہ صورتحال کا ذمہ دار قرار دیا، جس نے صیہونی فوج کو ایک مشکل صورتحال میں دھکیل دیا ہے۔

انہوں نے مزید کہا کہ صہیونی فوج اس وقت انتہائی بحرانی حالات سے دوچار ہے اور لبنان کے دلدل میں مسلسل فرسودگی کے باعث زوال کے دہانے پر کھڑی ہے۔

پوسٹول کے مطابق صیہونی فوجی کمانڈر نیتن یاہو کو یہ اطلاع دینا چاہتے ہیں کہ وہ ایک شدید بحران میں پھنس چکے ہیں، بڑی تعداد میں فوجیوں کو کھو رہے ہیں اور اب ان کے پاس مؤثر اقدامات کے امکانات محدود ہوتے جا رہے ہیں۔