اسرائیل کا سکیورٹی تباہ ہو رہا ہے؛ صیہونی جنرل کا اعتراف

?️ 24 جون 2026

سچ خبریں:ایک ریٹائرڈ صیہونی جنرل نے تسلیم کیا ہے کہ اسرائیل کے سکیورٹی ڈھانچے کی مکمل تباہی کا عمل جاری ہے۔

ایک ریٹائرڈ صیہونی جنرل یتزحاک بریک نے کہا ہے کہ اسرائیل کا سکیورٹی نظام کئی سطحوں پر ٹوٹ پھوٹ کا شکار ہے اور ملک کی سلامتی 1948 کے بعد بدترین صورتحال میں پہنچ چکی ہے۔

عبرانی زبان کی تجزیاتی ویب سائٹ نیوز ون کی رپورٹ کے مطابق ریٹائرڈ میجر جنرل یتزحاک بریک نے ایک تفصیلی تجزیے میں صیہونی سکیورٹی اور فوجی نظام کے مختلف حصوں میں بگڑتی صورتحال کا ذکر کیا ہے اور کہا ہے کہ موجودہ سلامتی حالات اسرائیل کی تاریخ کے بدترین دور میں داخل ہو چکے ہیں۔

رپورٹ کے مطابق انہوں نے زور دیا کہ اگرچہ بعض سطح پر وقتی اور محدود کامیابیاں حاصل ہوئی ہیں، لیکن مجموعی طور پر یہ پیش رفت کسی اسٹریٹجک کامیابی کے زمرے میں نہیں آتی۔

بریک کے مطابق ایران نے اپنی جنگی حکمت عملی میں بنیادی تبدیلی کی ہے اور اب اس کی توجہ فضائی محاذ کے بجائے عالمی معیشت پر مرکوز ہے، جس میں آبنائے ہرمز کو ایک اہم دباؤ کے ہتھیار کے طور پر استعمال کیا گیا ہے۔

ان کے بقول ایرانی فریق نے اس حکمت عملی کو کھلے عام بیان بھی کیا ہے، تاہم امریکی صدر ڈونلڈ ٹرمپ اور صیہونی وزیر اعظم بنیامین نیتن یاہو سمیت ان کے مشیروں نے اس کے نتائج کو درست طور پر سمجھنے میں ناکامی دکھائی۔

رپورٹ میں کہا گیا ہے کہ سابق صیہونی جنرل کے مطابق بعض فوجی کارروائیاں، جنہیں مغربی میڈیا میں نمایاں کیا گیا، دراصل وسیع تر ناکامیوں کا تسلسل ثابت ہوئیں اور خطے میں صورتحال مزید پیچیدہ ہو گئی۔

بریک نے اپنے تجزیے میں صیہونی فوج کی موجودہ کمزوریوں پر تفصیل سے روشنی ڈالی اور کہا کہ اسرائیل کا دفاعی نظام شدید بحران کا شکار ہے۔

انہوں نے اسرائیل کے مستقبل کے حوالے سے بھی تشویش کا اظہار کیا اور کہا کہ موجودہ صورتحال سے نکلنے کے لیے بنیادی اور ساختی اصلاحات ناگزیر ہیں۔

ان کے مطابق سب سے پہلے اعلیٰ فوجی اور سکیورٹی قیادت کی مکمل تبدیلی ضروری ہے تاکہ ایک نئے دفاعی ڈھانچے کی تشکیل ممکن ہو سکے۔