ایرانی سپاہ پاسداران نے یوم قدس کے موقع پر اہم بیان جاری کردیا

?️ 7 مئی 2021

تہران (سچ خبریں) ایرانی سپاہ پاسداران  نے یوم القدس کے موقع پر اہم بیان جاری کرتے ہوئے کہا ہے کہ انتفاضہ اور فلسطینی استقامت ہرگز نہیں رکے گی۔

سپاہ پاسداران انقلاب اسلامی نے اپنے بیان میں یوم القدس کو عالم اسلام کی وحدت، قدس شریف کی آزادی کی آرزو، استقامتی محاذ کے کمانڈر شہید قاسم سلیمانی کے خون کے انتقام کی نوید، مغربی ایشیا سے امریکہ کے باوردی دہشت گردوں کےانخلا اور علاقے کے سیاسی جغرافیہ سے صیہونی حکومت کو محو کئے جانے کے بعد اس کی جگہ ارض مقدس پر مکمل طور سے فلسطینی ریاست کی تشکیل کا مظہر قرار دیا ہے۔

سپاہ پاسداران انقلاب اسلامی نے اپنے بیان میں یوم القدس کو یوم اللہ سے تعبیر کیا اور مسئلہ فلسطین کے حل اور صیہونی حکومت کے سرطانی غدے کو جڑ سے اکھاڑ پھیکنے کے لئے مسلمان اقوام کے عزم و ارادے کی علامت قرار دیا۔

اس بیان میں شہدائے انتفاضہ اور قدس شریف کی آزادی کی راہ میں جانفشانی کرنے والے عظيم سپوت شہید جنرل قاسم سلیمانی کو خراج عقیدت پیش کرتے ہوئے ان کی راہ کو جاری رکھنے کا عز‍م ظاہر کیا ہے اور کہا ہے کہ خطے کی صورتحال کے پیش نظر صہیونی حکومت کے سقوط و زوال کے آثار نمایاں ہونا شروع ہوگئے ہیں۔

بیان میں کہا گیا ہے کہ صیہونی حکومت کے سقوط و زوال کے آثار، فلسطینی عوام کی روز افزوں استقامت، ارض مقدس پر مکمل فلسطینی ریاست کے قیام کے لئے رہبر انقلاب اسلامی کی اسٹراٹیجی پر مبنی ملت فلسطین کے عزم و ارادے اور دنیا میں سامراج مخالف استقامتی محاذ کے علمبردار کی حیثیت سے آیت اللہ العظمی سید علی خامنہ ای کے نظریہ استقامت کے عملی شکل اختیار کرنے کی نوید ملتی ہے۔

سپاہ پاسداران انقلاب اسلامی نے اپنے بیان میں واضح کیا ہے کہ شہید قدس جنرل قاسم سلیمانی کے خون کا انتقام اور علاقے سے امریکہ کے باوردی دہشت گردوں کے انخلا کی نوید رہبر انقلاب اسلامی کے نظریہ استقامت کا ہی مظہر ہے۔