ایران نے فلسطینیوں کی کامیابی کو خراج تحسین پیش کرنے کے لیئے غزہ نامی ڈرون کی رونمائی کردی

🗓️ 22 مئی 2021

تہران (سچ خبریں) ایران نے فلسطینیوں کی جانب سے اسرائیلی دہشت گردی کا ڈٹ کر مقابلہ کرنے اور ان کی شاندار کامیابی کو خراج تحسین پیش کرنے کے لیئے غزہ نامی ڈرون کی رونمائی کردی جس کو ایران کے اندر تیار کیا گیا ہے اور وہ 2 ہزار کلو میٹر تک مار کرسکتا ہے۔

تفصیلات کے مطابق ایران نے مقامی طور پر تیار کردہ 2 ہزار کلو میٹر تک مار کرنے والے لڑاکا ڈرون کی رونمائی کی اور فلسطینیوں کی جدوجہد کو خراج تحسین پیش کرنے کے لیے اس کا نام غزہ رکھ لیا۔

خبرایجنسی رائٹرز کی رپورٹ کے مطابق سرکاری میڈیا کا کہنا تھا کہ ڈرون کا نام فلسطینی جدوجہد سے متاثر ہوکر ان کے اعزاز میں غزہ رکھا گیا ہے، ایرانی پاسداران انقلاب کا کہنا تھا کہ نیا ڈرون میں 35 گھنٹے پرواز، 13 بم اور 500 کلو گرام الیکٹرونکس کی اشیا ساتھ لے جانے کی صلاحیت رکھتا ہے۔

پاسداران انقلاب کے میجر جنرل حسین سلامی کا کہنا تھا کہ نئے ڈرون کا نام غزہ ان کے اعزاز میں رکھا گیا ہے جو آج حملہ آور اور جارحیت پسند صہیونیوں کے خلاف برسر پیکار ہیں۔

ایران کے میزائل نظام کے خلاف امریکی سمیت مغربی طاقتیں آواز اٹھاتی رہتی ہیں تاہم ایران ان کو مسترد کرتا آیا ہے جبکہ ایران ہمیشہ غزہ کی حکمران جماعت حماس کی مدد کرتا رہا ہے۔

ایران نے حماس کی مالی یا دیگر ذرائع سے مدد کے حوالے سے دیے جانے والے بیانات پر کوئی ردعمل نہیں دیا تاہم حماس ایران سے بہترین تعلقات کا معترف ہے اور ہمیشہ اس بات کا اعتراف کیا ہیکہ ایرانی کی مدد کے بغیر ان کی کامیابی ممکن نہیں ہے۔

واضح رہے کہ ایران کے سپریم لیڈر آیت اللہ علی خامنہ ای فلسطین کے حق میں بیانات دیتے رہتے ہیں اور انہیں دنیا میں بیت المقدس اور فلسطینی قوم کا سب سے برا حامی سمجھا جاتا ہے اور اسی وجہ سے امریکا اور اسرائیل ایران سے دشمنی کرتے ہیں۔