صیہونی فوج میں نافرمانیوں میں اضافہ:سابق موساد اہلکار کا اعتراف

?️ 25 اپریل 2025

سچ خبریں:موساد کے سابق نائب سربراہ نے اعتراف کیا ہے کہ صہیونی افواج میں فوجی نافرمانی کے رجحانات میں نمایاں اضافہ ہو رہا ہے۔

الجزیرہ نیوز چینل کی رپورٹ کے مطابق صیہونی خفیہ ایجنسی موساد کے سابق نائب سربراہ نے اعتراف کیا ہے کہ صہیونی افواج میں فوجی نافرمانی کے رجحانات میں نمایاں اضافہ ہو رہا ہے۔ انہوں نے موجودہ حالات کو انتہائی نازک اور خطرناک قرار دیا ہے۔

الجزیرہ سے گفتگو کرتے ہوئے اس سابق اعلیٰ اہلکار نے کہا کہ اسرائیلی فوج کے اندر سے آنے والی نافرمانیوں اور احتجاجی بیانات نے سیکیورٹی اسٹیبلشمنٹ کو ہلا کر رکھ دیا ہے۔

یہ بھی پڑھیں:صیہونی فوج میں نافرمانی کی بڑھتی لہر

ان کے مطابق، فوجی اہلکاروں کی جانب سے جاری کردہ اعتراضی بیانات اور طومار اس بات کی علامت ہیں کہ غزہ میں جاری جنگ کے خلاف رائے عامہ شدت اختیار کر چکی ہے۔

انہوں نے واضح کیا کہ غزہ میں جنگ کے خاتمے اور قیدیوں کی رہائی کا فیصلہ صرف تل ابیب اور حماس کی قیادت کے درمیان براہ راست مذاکرات سے ہی ممکن ہے۔ ان کا کہنا تھا کہ فوجی آپریشنز اور دباؤ سے پائیدار حل ممکن نہیں۔

اس سابق موساد افسر نے مزید کہا کہ ہم اس وقت اسرائیل میں شدید سیاسی، سماجی اور ادارہ جاتی تقسیم کے گواہ ہیں۔ موجودہ بحران صرف میدان جنگ تک محدود نہیں بلکہ ریاستی سطح پر بھی گہرے شگاف پیدا ہو چکے ہیں۔

یہ بیان ایسے وقت میں سامنے آیا ہے جب غزہ پر اسرائیلی بمباری اور فوجی کارروائیوں کو اندرونِ اسرائیل بھی شدید تنقید کا سامنا ہے۔ بڑھتی ہوئی ہلاکتوں، طویل جنگ، اور قیدیوں کی رہائی میں ناکامی نے نہ صرف فوجی اہلکاروں بلکہ عام شہریوں کو بھی احتجاج پر مجبور کر دیا ہے۔

مزید پڑھیں:صیہونی فوج میں کیا ہو رہا ہے؟ صیہونی میڈیا کی زبانی

اسرائیلی معاشرے میں سیاسی قیادت پر عدم اعتماد بڑھ رہا ہے، اور کئی مبصرین کا کہنا ہے کہ اگر یہ نافرمانیاں جاری رہیں تو فوجی نظم و ضبط شدید متاثر ہو سکتا ہے، جو اسرائیل کی داخلی سلامتی کے لیے بڑا خطرہ بن سکتا ہے۔