غزہ کی جنگ ناقابلِ برداشت ہے،اسرائیل جنگ بندی پر آمادہ نہیں: گوترش

غزہ کی جنگ ناقابلِ برداشت ہے، اسرائیل جنگ بندی پر آمادہ نہیں: گوترش

 اقوام متحدہ کے سیکرٹری جنرل آنتونیو گوترش نے کہا ہے کہ غزہ میں جاری جنگ اب ناقابلِ برداشت ہو چکی ہے اور حالیہ حملہ دوحہ (قطر) اس بات کا ثبوت ہے کہ اسرائیل جنگ بندی کے لیے کسی سنجیدہ مذاکرات میں دلچسپی نہیں رکھتا۔

گوترش نے صحافیوں سے گفتگو میں کہا آئیں صاف بات کریں، قطر پر حملے کے بعد واضح ہے کہ اسرائیل نہ جنگ بندی چاہتا ہے اور نہ ہی قیدیوں کی رہائی کے لیے کوئی حقیقی مذاکرات۔

انہوں نے مزید کہا کہ قطر نے اعلان کیا ہے کہ وہ ایک بار پھر ثالثی کے لیے تیار ہے اور یہ عمل نہایت اہم ہے تاکہ فوری جنگ بندی ہو، قیدیوں کو رہا کیا جائے اور غزہ میں انسانی امداد فوری طور پر پہنچ سکے۔

سیکرٹری جنرل نے امید ظاہر کی کہ قطر اور امریکہ کی ملاقات سے واشنگٹن، اسرائیل پر دباؤ ڈالے تاکہ وہ مذاکرات کو سنجیدگی سے لے۔اقوام متحدہ کی کمیٹی برائے حقیقت یاب نے اپنی تازہ رپورٹ میں کہا ہے کہ اسرائیل غزہ میں نسل کشی کر رہا ہے۔ رپورٹ میں الزام لگایا گیا کہ اسرائیلی قیادت، بشمول وزیراعظم بنیامین نیتن یاہو، فلسطینیوں کے خلاف نسل کشی کی مہم کو آگے بڑھا رہے ہیں۔

رپورٹ میں بڑے پیمانے پر قتل عام، امداد کی راہ میں رکاوٹ، جبری بے دخلی اور اسپتالوں کی تباہی کے شواہد شامل ہیں۔کمیٹی کی سربراہ اور سابق عالمی فوجداری عدالت کی جج ناوی پیلای نے کہا غزہ میں نسل کشی جاری ہے اور اس کا براہِ راست ذمہ اسرائیل کی اعلیٰ قیادت ہے جو دو سال سے اس مقصد کے لیے منظم مہم چلا رہی ہے۔

اسرائیل نے کمیٹی کے ساتھ تعاون سے انکار کرتے ہوئے الزام لگایا کہ یہ کمیٹی سیاسی ایجنڈا پر کام کر رہی ہے۔ اسرائیلی وزارتِ خارجہ نے رپورٹ کو غلط اور مسخ شدہ قرار دے کر مسترد کر دیا۔