حسین عبداللہ سلامہ شام کی عبوری حکومت میں انٹیلیجنس سربراہ مقرر

سچ خبریں: شام کی عبوری حکومت کے سربراہ محمو جولانی نے حسین عبداللہ سلامہ کو انٹیلیجنس ادارے کا نیا سربراہ مقرر کر دیا، جو سابقہ عسکری تجربے اور داخلی جنگی کردار کے باعث ادارے کی تشکیلِ نو میں کلیدی کردار ادا کر سکتے ہیں۔

شام کی عبوری حکومت، جس کی قیادت محمو جولانی کر رہے ہیں، نے ہفتہ کی شب حسین عبداللہ السلامہ کو ملک کے انٹیلیجنس ادارے کا نیا سربراہ مقرر کر دیا، وہ انس خطاب کی جگہ لیں گے، جنہوں نے حال ہی میں اس عہدے سے استعفیٰ دیا تھا۔

یہ بھی پڑھیں: الجولانی کا نئی کابینہ تشکیل دینے کا اعلان

حسین سلامہ کا تعلق دیرالزور کے شہر الشحیل سے ہے، جہاں وہ 1984 میں پیدا ہوئے، وہ العکیدات قبیلے کے رکن ہیں، انہوں نے اپنی ثانوی تعلیم دیرالزور میں مکمل کی اور بعد ازاں انسٹی ٹیوٹ آف ٹیکنیکل آبزرورز سے گریجویشن کیا۔

شام کی خانہ جنگی کے دوران، حسین سلامہ نے دہشت گرد گروہ تحریر الشام کی عسکری ونگ میں شمولیت اختیار کی، اور جلد ہی اس کے سینئر کمانڈرز میں شمار ہونے لگے۔ بشار الاسد کی حکومت کے زوال کے بعد، انہوں نے عبوری حکومت میں شمولیت اختیار کی اور دیرالزور، رَقہ اور حسکہ کے عبوری گورنر کے طور پر تقرری حاصل کی، تاہم ایک ماہ کے اندر اندر وہ مستعفی ہو گئے اور دوبارہ عسکری میدان میں واپس آ گئے۔

مارچ 2025 میں شامی حکومت اور کرد اکثریتی سیریئن ڈیموکریٹک فورسز (قسد) کے درمیان ہونے والے ایک معاہدے کے بعد، حسین سلامہ کو پانچ رکنی کمیٹی کا سربراہ مقرر کیا گیا، جسے مذاکرات اور سیکیورٹی انتظامات کی نگرانی کی ذمہ داری سونپی گئی۔

حسین سلامہ کی بطور سربراہ انٹیلیجنس تقرری، عبوری حکومت کے سیکیورٹی ڈھانچے کی بحالی اور نئی تشکیل کا حصہ ہے۔ سابق سربراہ انس خطاب نے پہلے ہی اعلان کیا تھا کہ پرانے سیکیورٹی اداروں کو تحلیل کر کے نئے ادارے تشکیل دیے جائیں گے جو ملک میں امن و استحکام کو بحال کرنے میں مددگار ہوں گے۔

مزید پڑھیں: فرانس میں الجولانی کے خلاف مقدمہ؛ شامی عوام کی عزتِ نفس کی بحالی کا موقع

سلامہ کے عسکری پس منظر اور میدانی تجربے کی بنیاد پر تجزیہ کاروں کا ماننا ہے کہ وہ شام کے نئے سیکیورٹی ادارے کی تشکیلِ نو میں کلیدی کردار ادا کریں گے، خاص طور پر موجودہ سیکیورٹی خلاء کو پُر کرنے میں۔