بین الاقوامی کشتی کاروان صمود کے بڑے بحری جہاز کے اوپر ڈرونز کی پرواز

سچ خبریں:بین الاقوامی کشتی صمود کی انتظامیہ نے اعلان کیا ہے کہ اس کاروان کے ایک بڑے بحری جہاز کے اوپر ڈرونز کی وسیع پروازیں دیکھی گئی ہیں اور جہاز پر ہنگامی صورتحال نافذ کر دی گئی ہے۔

الجزیرہ نیوز چینل کے نمائندے نے صمود انتظامیہ کے حوالے سے بتایا کہ متعدد ممالک نے اپنے ان شہریوں کو وارننگ جاری کی ہے جو اس کاروان میں شریک ہیں کہ اسرائیل کی جانب سے ممکنہ حملے کا خطرہ موجود ہے۔

یہ بھی پڑھیں:بارسلونا سے غزہ تک؛ صمود کشتی کارواں حملات کے باوجود رواں دواں

ادارے کے مطابق عمر المختار نامی جہاز، جو تنہا صمود کاروان میں شامل ہونے کے لیے رواں دواں ہے، کے اوپر بھی تین ڈرونز پرواز کرتے دیکھے گئے ہیں۔

قابل ذکر ہے کہ عالمی کاروان صمود پچاس سے زائد جہازوں پر مشتمل ہے، جو اہل غزہ کی امداد اور محاصرے کو توڑنے کے مقصد سے رواں ماہ کے آغاز میں اسپین کے ساحلی شہر بارسلونا سے روانہ ہوا تھا، بعد ازاں دنیا کے مختلف خطوں سے مزید جہاز اس کاروان میں شامل ہوتے گئے۔

پیر کی شب اس بیڑے کی نو کشتیاں اسرائیلی ڈرونز کے 14 حملوں کی زد میں آئیں۔ اس کے بعد تمام جہازوں پر ایمرجنسی پروٹوکول نافذ کر دیا گیا، جب ڈرونز کی پروازوں کے ساتھ ساتھ صوتی بم اور پروجیکٹائل بھی چند کشتیوں کی طرف پھینکے گئے۔

ادھر بین الاقوامی کمیٹی برائے محاصرہ شکنی نے بھی ان حملوں کی تصدیق کرتے ہوئے کہا ہے کہ یہ دباؤ اہل غزہ تک امداد کی رسائی روکنے کی کوشش ہے۔

مزید پڑھیں:اقوام متحدہ سے غزہ کی جانب روانہ صمود کشتی کی حمایت کی درخواست

ان حملوں اور بڑھتی ہوئی دھمکیوں کے جواب میں بدھ کی صبح ایک اطالوی ریسکیو اور امدادی جہاز صمود بیڑے کے تحفظ کے لیے بھیج دیا گیا جبکہ اسپین نے بھی اعلان کیا ہے کہ وہ اپنی بحریہ کا ایک آپریشنل شپ کارتاجینا سے مشرقی بحیرہ روم روانہ کر رہا ہے تاکہ اس کاروان کو غزہ پہنچنے تک سکیورٹی اور معاونت فراہم کی جا سکے۔