ترکی میں گرفتاریوں کا بازار گرم

سچ خبریں:ترکی کے وزیر داخلہ علی یرلیکایا نے اعلان کیا ہے کہ اس ملک بھر میں جاری عوامی احتجاج کے دوران گزشتہ شب 9 شہروں سے 343 افراد کو گرفتار کیا گیا ہے،یہ گرفتاریاں بلدیاتی امور اور عوامی بدامنی کے الزامات کے تحت عمل میں لائی گئیں۔

یہ بھی پڑھیں: ترکی میں اردگان کے مخالفین کے خلاف گرفتاریوں اور عدالتی سزاؤں میں اضافہ

ترک خبررساں ایجنسی اناطولی کی رپورٹ کے مطابق اس ملک کے وزیر داخلہ علی یرلیکایا نے سوشل میڈیا پلیٹ فارم ایکس پر جاری بیان میں کہا کہ یہ گرفتاریاں استنبول، انقرہ، ازمیر، آدانا، انطالیہ، چناق قلعہ، اسکیشہر، قونیہ اور ادرنہ سمیت 9 بڑے شہروں میں کی گئیں۔

ترک وزیر داخلہ نے مزید کہا کہ ہم کسی کو بھی عوامی نظم و نسق کو خراب کرنے یا شہریوں کے امن کو خطرے میں ڈالنے کی اجازت نہیں دیں گے۔

انہوں نے کہا کہ اشتعال انگیزی یا بدامنی پھیلانے والوں کے خلاف سخت کارروائی کی جائے گی،ہماری پولیس فورس ملک میں امن و امان کی بحالی کے لیے چوبیس گھنٹے مصروف عمل ہے۔

یاد رہے کہ یہ صورتحال ایک ایسے وقت میں سامنے آئی ہے جب ترکی میں صدر رجب طیب اردغان کے سیاسی حریف اور استنبول کے میئر اکرم امام اوغلو کی گرفتاری کے بعد ملک بھر میں مظاہروں کی لہر دوڑ گئی ہے خاص طور پر استنبول اور ازمیر میں بڑے پیمانے پر عوام سڑکوں پر نکل آئے ہیں اور حکومت مخالف احتجاج کر رہے ہیں۔

مزید پڑھیں:ترکی میں ایک سیاسی ہلچل؛ پارلیمانی نظام کی واپسی کا امکان 

سیاسی تجزیہ کاروں کا ماننا ہے کہ امام اوغلو کی گرفتاری حکومت کی جانب سے اپوزیشن کو دبانے کی ایک اور کوشش ہے، جس سے ترکی میں سیاسی کشیدگی میں مزید اضافہ ہو رہا ہے۔