انڈونیشیا کی لاپتہ آبدوز میں موجود تمام افراد کی ہلاکت کی تصدیق ہوگئی

?️ 26 اپریل 2021

جکارتا (سچ خبریں)  انڈونیشیا میں حکام کا کہنا ہے کہ اتوار کے روز گم شدہ آبدوز کا پتہ لگا لیا گیا ہے، بحریہ کے سربراہ یودو مارگونو کا کہنا ہے کہ آبدوز تین ٹکڑوں میں ٹوٹ کر بکھر گئی ہے۔

ایئر مارشل ہادی تہاجانتو نے اس حوالے سے ایک پریس کانفرنس سے خطاب کے دوران کہا، کہ اس مستند ثبوت کے ساتھ، ہم اس بات کی تصدیق کر سکتے ہیں کہ کے آر آئی ننگ گالا 402 ڈوب گئی ہے اور اس میں سوار عملے کے 53 افراد بھی اپنے فرائض انجام دیتے ہوئے انتقال کر گئے۔

غیر ملکی میڈیا کے مطابق انڈونیشیا کی لاپتہ آبدوز پانچ روز بعد سمندر کی تہہ سے مل گئی تاہم آبدوز تین ٹکڑوں میں ٹوٹی ہوئی ملی اور آبدوز میں موجود عملے کے تمام 53 افراد زندگی کی بازی ہار گئے، انڈونیشین بحریہ کے سربراہ یودو مرگونو کے مطابق لاپتہ آبدوز بالی کے سمندر کی تہہ سے ملی۔

واضح رہے کہ بد قسمت انڈونیشین آبدوز بدھ کے روز بالی کے جزیرے کے شمال میں جنگی مشقیں کر رہی تھی کہ اچانک اس کا رابطہ منقطع ہو گیا جس کے بعد وہ لاپتہ ہوگئی۔

آبدوز کی گمشدگی کی اطلاع ملتے ہی بحریہ کے اہلکاروں کی جانیں بچانے کیلئے کارروائی کا عمل شروع کر دیا گیا تھا لیکن اس کا کوئی سراغ نہیں مل رہا تھا۔ اس سلسلے میں انڈونیشین حکام نے آسٹریلیا اور سنگاپور سے بھی مدد کی اپیل کی تھی۔

رائٹرز کے مطابق اس آبدوز کو 1970ء کی دہائی کے آخری برسوں میں بنایا گیا تھا جس کے بعد 2012ء میں اس کی جنوبی کوریا میں دو سال تک مرمت کی گئی۔