امریکی قانون سازوں کا غزہ کے کینسر مریضوں کی مدد کے لیے اسرائیل پر دباؤ ڈالنے کا مطالبہ

?️ 12 جون 2026

سچ خبریں: امریکی ایوانِ نمائندگان کے 61 ارکان نے وزیر خارجہ مارکو روبیو کو ایک خط لکھ کر غزہ کی انسانی بحران کی صورتحال کم کرنے اور وہاں کے کینسر کے مریضوں کی مدد کے لیے فوری اقدامات کا مطالبہ کیا ہے۔

ریاست میساچوسٹس سے تعلق رکھنے والے ڈیموکریٹ رکنِ کانگریس جیمز میک گورن نے جمعہ کے روز ایک بیان میں کہا کہ 61 قانون سازوں نے اپنے خط میں روبیو سے مطالبہ کیا ہے کہ امریکہ اسرائیلی حکومت پر دباؤ ڈالے تاکہ ایک طبی راہداری (میڈیکل کوریڈور) قائم کی جا سکے۔ اس کے ذریعے غزہ کے فلسطینی کینسر مریض مشرقی القدس اور مغربی کنارے میں جا کر زندگی بچانے والے طبی علاج حاصل کر سکیں۔

انہوں نے امریکی حکومت سے یہ بھی مطالبہ کیا کہ غزہ کے طبی ڈھانچے کی بحالی اور اس کے تحفظ کو یقینی بنایا جائے۔

امریکی ارکانِ کانگریس کے خط میں کہا گیا ہے:

“غزہ میں کینسر کی تشخیص عملاً سزائے موت بن چکی ہے۔ یہ ضروری ہے کہ امریکہ اور اس کے علاقائی شراکت دار اسرائیلی حکومت سے مطالبہ کریں کہ وہ غزہ کے کینسر مریضوں کے لیے طبی راستہ دوبارہ کھولے تاکہ وہ مشرقی القدس اور مغربی کنارے میں زندگی بچانے والا علاج حاصل کر سکیں۔”

خط میں خاص طور پر خون کے سرطان لیوکیمیا میں مبتلا ایک 6 سالہ فلسطینی بچے کا ذکر کیا گیا ہے، جو غزہ سے باہر علاج کے لیے اسرائیلی اجازت نامے کا انتظار کرتے ہوئے جان کی بازی ہار گیا۔

امریکی قانون سازوں نے خبردار کیا کہ 18,500 سے زائد فلسطینی فوری طبی علاج کے محتاج ہیں، جن میں تقریباً 11,000 کینسر کے مریض شامل ہیں، جبکہ یہ علاج اس وقت غزہ میں دستیاب نہیں ہے۔