10 ممالک فلسطین کو بطور آزاد ریاست تسلیم کریں گے:فرانس

10 ممالک فلسطین کو بطور آزاد ریاست تسلیم کریں گے:فرانس

ایلیزے محل کے ایک ذریعے نے تصدیق کی ہے کہ اس ہفتے دس ممالک فلسطین کو باضابطہ طور پر ایک آزاد ریاست کے طور پر تسلیم کرنے جا رہے ہیں۔

بین الاقوامی خبر رساں ادارے نشنل کے مطابق کینیڈا، آسٹریلیا، پرتگال، بیلجیم، مالٹا، لکسمبرگ، سان مارینو، آندورا اور فرانس پیر کے روز نیویارک میں اقوام متحدہ کے ہیڈکوارٹر میں ہونے والی بین الاقوامی فلسطین کانفرنس میں شریک ہوں گے، جہاں ان کی جانب سے فلسطین کو تسلیم کرنے کا اعلان کیا جائے گا۔ یہ کانفرنس فرانس اور سعودی عرب کی مشترکہ میزبانی میں منعقد ہو رہی ہے۔

رپورٹ کے مطابق فرانسیسی صدر امانوئل میکرون، جو جنرل اسمبلی میں شرکت کے لیے امریکا جا رہے ہیں، پیر کو نیویارک کے مقامی وقت کے مطابق سہ پہر 3 بجے فرانس کا باضابطہ موقف پیش کریں گے۔

برطانیہ بھی اتوار کی شب یا پیر کو اپنا فیصلہ ظاہر کرنے کا امکان رکھتا ہے، جبکہ پرتگال کی وزارت خارجہ نے ایک بیان میں کہا ہے کہ وہ اتوار کو ہی فلسطین کو تسلیم کرنے کا اعلان کرے گا۔

فرانسیسی صدر کے ایک مشیر نے اس پیشرفت کو اہم موڑ قرار دیتے ہوئے کہا: یا تو ہم اجتماعی طور پر دو ریاستی حل کو بچانے کے لیے اقدامات کریں گے، یا پھر مزید مشکلات کی طرف بڑھیں گے۔

انہوں نے اسرائیلی منصوبے کے تحت غرب اردن کے حصوں کو ضم کرنے اور وہاں یہودی بستیوں کی توسیع کو سرخ لکیر اور بین الاقوامی قوانین کی سنگین خلاف ورزی قرار دیا۔ ان کا کہنا تھا کہ یہ اقدام اقوام متحدہ کی قراردادوں کی کھلی خلاف ورزی ہے۔

مشیر نے مزید کہا کہ اس وقت سب سے اہم مسئلہ دو ریاستی حل کو محفوظ رکھنا ہے، جبکہ غرب اردن کا الحاق اس حل کے لیے سب سے بڑا خطرہ بن چکا ہے۔