نمرہ خان نے مداحوں سے دعاؤں کی اپیل کر دی

?️ 11 اگست 2021

کراچی (سچ خبریں) پاکستانی ڈرامہ انڈسٹری کی مقبول ترین اداکارہ نمرہ خان کا معدے میں انفیکشن کے باعث شدید تکلیف میں ہیں، انہوں نے مداحوں سے اپیل کی ہے کہ وہ دو منٹ نکال کر ان کی جلد صحتیابی کیلئے دعا کریں۔ انفیکشن اور پتھری کے باعث ہونے والی تکلیف کو وہ الفاظ میں بیان نہیں کرسکتیں۔

سوشل میڈیا سائٹ انسٹاگرام پر اداکارہ نے کچھ اسٹوریز اور پھر کچھ وائس نوٹس کے ذریعے مداحوں کو اپنی شدید علالت کا بتاتے ہوئے دعاؤں کی اپیل کی۔انہوں نے ہاتھ پر ڈرپ لگے اور ماسک پہنے اسپتال میں لی گئی اپنی ایک تصویر شیئر کرتے ہوئے لکھا کہ وہ شدید تکلیف میں ہیں ، صحتیابی کیلئے دعاؤں کی درخواست ہے۔

ایک اور اسٹوری میں انہوں نے لکھا کہ کوئی اس بات کا اندازہ نہیں لگا سکتا کہ میں کس قدر تکلیف میں ہوں، براہِ کرم میرے لیے دعا کریں۔اپنی انسٹاگرام اسٹوری میں انہوں نے روہانسے انداز میں بتایا کہ ان کے معدے میں شدید درد ہے، انفیکشن اور پتھری کے باعث ہونے والی تکلیف کو وہ الفاظ میں بیان نہیں کرسکتیں۔

اداکارہ نے یہ بھی کہا کہ اس وقت انہیں دعاؤں، سپورٹ اور ڈھیر ساری نیک خواہشات کی ضرورت ہے۔یاد رہے کہ نمرہ خان 2014 میں کار حادثے کا شکار ہوئی تھیں جس کے باعث وہ شدید زخمی ہوگئی تھیں اور ڈاکٹرز کا کہنا تھا کہ اداکارہ کی حالت تشویشناک ہے لیکن ہمت اور حوصلے سے اداکارہ خود کو صحتیاب کرنے میں کامیاب ہوگئی تھیں۔

26 جون 1991 کو پیدا ہونے والی نمرہ پاکستان ٹی وی انڈسٹری کی معروف اداکارہ ہیں، انہوں نے بہت کم وقت میں ہی اپنی باصلاحیت اداکاری سے بہت کم وقت میں ہی نام کمانے میں کامیاب رہیں۔2013 میں پی ٹی وی کے ڈرامے ’خواب تعبیر‘ سے کیرئیر کا آغاز کرنے والی نمرہ خان نے بھول، اُڑان، چھوٹی سی زندگی، رشتہ انجانا سا جیسے ڈراموں میں اپنی جاندار اداکاری سے مداحوں کے دل جیتے۔30 سالہ نمرہ پاکستانی فلم ’سایہ خدائے زوالجلال‘ میں بھی مرکزی کردار ادا کرچکی ہیں۔