عائشہ عمر کا ایس او پیز پر سختی سے عمل کرنے پر زور

?️ 30 اپریل 2021

کراچی (سچ خبریں) پاکستان کی معروف اداکارہ عائشہ عمر نے ملک بھر میں کورونا کی بگڑتی صورتحال پر تشویش کا اظہار کرتے ہوئے کہا ہے کہ ایس او پیز پر بہت سختی سے عمل کیا جائے۔خواراک میں وٹامنز شامل کریں اور پریشانی یا دباؤ کو کم کرنے کے عبادت اور ورزش کریں۔

سماجی رابطے کی ویب سائٹ ٹوئٹر پر عائشہ عمر نے لکھا کہ آکسیجن کی سپلائی ختم ہوتی جارہی ہے جبکہ ویکسین بھی تقریباً ختم ہوگئی ہے۔ایس او پیز پر سختی سے عمل کریں۔جتنا ممکن ہوسکے صاف اور صحت مند غذا کھائیں۔

عائشہ عمر نے اپنے پیغام میں مزید لکھا کہ اپنی خوراک میں وٹامنز کو شامل کریں،اپنی پریشانی یا دباؤ کو کم کرنے کے لئے عبادت اور ورزش کریں۔اداکارہ نے الگ سے ایک پیغام میں سختی سے کورونا ایس او پیز پر عمل کرنے کی اپیل بھی کی۔

دوسری جانب پاکستان شوبز انڈسٹری کی سینئر اداکارہ مرینہ خان بھی عالمی وبا کورونا وائرس کی تیسری لہر کا شکار ہوگئیں جس کی اطلاع اُنہوں نے اپنے سوشل میڈیا پیغام میں دی۔مرینہ خان نے اپنے تصدیق شدہ انسٹاگرام اکاؤنٹ پر اپنے مداحوں اور دوستوں کے لیے خصوصی ویڈیو پیغام جاری کیا۔

اداکارہ نے اپنے ویڈیو پیغام میں بتایا کہ ’وہ 14 دن تک اپنے کمرے میں اکیلی ہی رہیں گی کیونکہ وہ کورونا وائرس کا شکار ہوگئی ہیں۔اُنہوں نے کہا کہ ’میں نے خود کو بہت بچایا لیکن بدقسمتی سے میرا کورونا ٹیسٹ مثبت آگیا۔مرینہ خان نے کورونا علامات کے بارے میں بتاتے ہوئے کہا کہ ’مجھے کبھی بخار چڑھتا اور کبھی اُترتا جبکہ سر کا درد اب پہلے سے کم ہوگیا ہے۔

سینئر اداکارہ نے کہا کہ ’میں پہلے کورونا وائرس کو اتنا سنجیدہ نہیں لیتی تھی لیکن میں جب سے وائرس کی شکار ہوئی ہوں تب سے خوفزدہ ہوگئی ہوں۔اُنہوں نے مزید کہا کہ ’لوگوں کی باتوں میں نہ آئیں اور کورونا وائرس کو سنجیدہ لیتے ہوئے احتیاطی تدابیر اختیار کریں۔