اسرائیل کو ریاست نہیں مانتے، گوہر رشید اور شوبز شخصیات کا فلسطینیوں سے اظہار یکجہتی

?️ 24 اکتوبر 2023

کراچی: (سچ خبریں) فلسطین پر اسرائیلی حملوں کے خلاف پاکستانی شوبز شخصیات مسلسل سوشل میڈیا پر احتجاج کرتی دکھائی دیتی ہیں جب کہ بھارت، برطانیہ اور امریکا سمیت دیگر ممالک کی شوبز شخصیات نے بھی اسرائیلی جارحیت کی مذمت کی ہے۔

دیگر پاکستانی شوبز شخصیات کی طرح گوہر رشید، یاسر حسین، ارمینا خان اور اشنا شاہ سمیت دیگر اداکاروں نے کھل کر فلسطین کی حمایت کرتے ہوئے اسرائیلی مظالم کی مذمت کی ہے۔

اداکارہ ارمینا خان نے انسٹاگرام پر فلسطینیوں سے اظہار یکجہتی کے لیے متعدد پوسٹس شیئر کیں، جس میں سے ایک پوسٹ میں اسرائیلی حملوں کے بعد ملبے کے ڈھیر تبدیل کیے گئے غزہ کی ویڈیو شیئر کی گئی۔

مذکورہ ویڈیو میں عربی زبان میں پس پردہ رونے اور اپنے پیاروں کو پکارنے کی آوازیں سنائی دیتی ہیں۔

مذکورہ ویڈیو میں اسرائیلی بمباری سے تباہ غزہ کی عمارتوں کا ملبہ دیکھا جا سکتا ہے اور مذکورہ ملبے کے نیچے ممکنہ طور پر دب کر ہلاک ہونے والے اپنے پیاروں کو تلاش کرنے والوں کی آواز سنائی دیتی ہیں۔

انہوں نے اپنے بچوں اور پیاروں کو ملبے کے ڈھیر کے نیچے تلاش کرتے افراد کی پس پردہ آواز کی ویڈیو شیئر کرتے ہوئے ایک لکھاری کا اقتباس لکھا کہ ’وہ اس بات پر یقین نہیں کر سکتے کہ اس زمانے بھی وحشی لوگ انسانوں کو جلا اور مار سکتے ہیں‘۔

اداکارہ نے مذکورہ پوسٹ کے علاوہ بھی فلسطین کی حمایت میں دیگر پوسٹس کیں اور کھل کر اسرائیل کی مذمت کی۔

ان کی طرح اداکار یاسر حسین نے بھی انسٹاگرام پر فلسطین کے جھنڈے کی تصویر شیئر کرتے ہوئے لکھا کہ ’ہر اندھیری رات کے بعد صبح شروع ہوتی ہے اور انشااللہ صبح ہوگی‘۔

ان کی طرح اداکار گوہر رشید نے بھی فلسطینیوں کی حمایت میں پوسٹ لکھتے ہوئے اسرائیل کو ریاست ماننے سے انکار کیا اور کہا کہ وہ تو ہتھیاروں اور قاتلوں سے بھرا ایک مقام ہے۔

اداکار نے اپنی پوسٹ میں لکھا کہ اسرائیل گزشتہ 75 سال سے فلسطین اور فلسطینیوں کو ختم کرنے کی کوشش میں مصروف ہے لیکن آج تک اسے کامیابی نہیں مل سکی۔

گوہر رشید کے مطابق اسرائیل نے جدید سے جدید اسلحہ اور ٹیکنالوجی کا استعمال کرکے فلسطینیوں کو ختم کرنے کی کوشش کی لیکن اس کی ہر کوشش ناکام گئی۔

اداکار نے مزید لکھا کہ اسرائیل، مسلمان کو قتل کر سکتا ہے لیکن ان کے عقائد کو ختم نہیں کر سکتا اور یہ کہ دنیا کبھی فلسطین کو بھلا نہیں سکتی۔

ان کی طرح اداکارہ اشنا شاہ نے بھی انسٹاگرام پر فلسطینیوں سے اظہار یکجہتی کی پوسٹس کیں اور انہوں نے غزہ کی الشفا ہسپتال کی ایک ویڈیو بھی شیئر کی، جس میں بے حال زخمی افراد کوہسپتال کے فرش پر تڑپتے ہوئے دیکھا جا سکتا ہے۔

اداکارہ نے لکھا کہ مذکورہ ہسپتال میں دو دن کے بعد ادویات اور تمام چیزیں ختم ہو جائیں گی، جس کے بعد بچے، خواتین اور زخمی مرد تڑپتے رہیں گے اور اب ان کے پاس زیادہ وقت نہیں بچا۔